Politiijain lei ollu bargu mannan ija, muhtin sajis šadde maid jaskkodahttit feasta gos ledje riegádanbeaivvedoalut, dán dieđiha Finnmárkku politiijaguovlu Twitteris.
Politiijain lei ollu bargu mannan ija, muhtin sajis šadde maid jaskkodahttit feasta gos ledje riegádanbeaivvedoalut, dán dieđiha Finnmárkku politiijaguovlu Twitteris.
Sotnabeaičuovganeapmái ledje máŋgga sajis feasttat Finnmárkkus.
Áltá
Muhtin almmái 30-jagiin gevrejuvvui eret gávpotguovddážis. Politiijat dieđihedje son muosehuhtii earáid muhtin olgobáikkis.
Politiijat maid šadde heaittihit feasta muhtin dálus Álttás, gos čuojahedje musihka menddo jitnosit.
Hámmárfeasta
Politiijaide bođii diehtu ahte muhtin dálus Hámmárfeasttas čuojahedje musihka menddo jitnosit. Politiijat manne báikái ja dáhtto heaittihit feasta. 10 minuhta maŋŋá fas šadde politiijat mannat ja gurret dálu.
Politiijat maid šadde heaittihit guokte eará feasta Hámmárfeasttas, ovdal go de jaskkodii. Nuppi feasttas váidojuvvo dálueaiggát go ii doahttalan politiija gohččuma jaskkodit.
Politiijat maid šadde jávkkihit drošše vuordinsadjái gos dieđihuvvui doarrun. Muhtin almmái 30-jagiin dolvojuvvui doaktára lusa, go lei čiekŋalishávvi ámadajus ja lei doadján báni. Muhtin almmái 30-jagiin navdo leat časkán albmá.
Muhtin eará almmái 30-jagiin maid gohččojuvvui eret gávpotguovddážis go lei badjelmeare juhkan.
Kirkonjárga
Politiijat ožžo dieđu ahte muhtin priváhtadoaluin ledje doarrumat.
– Mii leat dál báikkis jaskkodahttimin. Doppe lei leamaš riegádanbeaidoalut, dieđihit politiijat.
Honnesváhki
Politiijat gohččojuvvo muhtin festii gos ledje nuorat. Feasta heaittihuvvui ja politiijat áigot dál váhnemiid ja nuoraid bovdet ságastallamii.
Čáhcesuolu
Čáhcesullui lei maid feasta muhtin dálus gos čuojahedje musihka menddo jitnosit. Feasta lea dál nohkan, dieđihit politiijat.
