-Almmuhus-
-Almmuhus-
-Almmuhus-
OĐĐASATFeastariejat, veahkaválddálašvuođat, rakeahttabáhčin viesuid guvlui

Feastariejat, veahkaválddálašvuođat, rakeahttabáhčin viesuid guvlui

-

-

Politiijain lea ollu bargu leamaš mannan ija Finnmárkkus, ja muhtin báikkiin ávvudedje ođđajagi badjelmeare.

– Leat ollu dáhpáhusat leamaš politiijaide čoavdit mannan ija, erenoamážit dan geažil go olbmot leat juhkan alkoholajuhkosiid. Leat leamaš ollu rigearat, jugešvuođat ja veahkaválddálašvuohta lagas oktavuođain máŋgga báikkis Finnmárkkus, muitala operašuvdnaguovddáža jođiheaddji Ann Rigmor Søderholm.

 

Veahkaválddálašvuohta lagas birrasis
Sihke Álttás ja Davvesiiddas leat politiijaide dieđihuvvon veahkaválddálašvuođat lagas birrasiin.

 

Álttás ollu olbmot ja riejat
Álttás ledje buot eanemus dáhpáhusat mannan ija, duođašta operašuvdnaguovddáš.
Muhtin viesus dieđihuvvui cuovkun, go lei nisu hárbman go gevrehalai guođđit feastta. Politiijat ásahit ášši dáhpáhusas.

Olbmot, geat eai lean bovdejuvvon guossái muhtin vissui, báhkkejedje aŋkke sisa.

Politiijat ožžo dieđu muhtin olbmá birra gii lei áitime earáid. Politiijat fitne báikkis.

Muhtin vissui ledje čoahkkanan beare ollu olbmot ja báikkis ii lean šat kontrolla dili badjel, muhto politiijat dieđihit ahte sis ii leat kapasitehta boahtit dohko. Ovtta eará viesus lei maid seamma dilli, ja politiijat fitne báikkis.

 

Biiladáhpáhusat Álttás
Dieđihuvvui ahte ovtta biillas ledje beare ollu olbmot. Maiddái biilla gálvolanjas ledje olbmot. Politiijat eai gávdnan biilla go vulge ohcat.

Okta biila vujii badjel luotta ja muora njeaiga. Biilavuoddji  lei bijadan eret báikkis go politiijat ollejedje dohko.

Muhtin dievdu, gii lei bearehaga gárihuvvan, bálkkui geđggiid biillaid njeaiga mat čužžo lahkosis.

 

Deanus
Deanus lei muhtin olgoriikka biilavuoddji gárrenoaivvis vuodjime biillain. Politiijat leat áššáiduhttán dievddu.

 

Hámmárfeasttas maid riedja
Hammerfeastas leat muhtimat bihkon allajienat musihka muhtin ránnjáviesus.

Soapmásat ledje doarrán muhtin olgobáikki olggobealde, ja politiijat vižže ovtta dorona ja dolvo su giddagassii go ii nagodan albma ládje láhttet.

Muhtun hoteallas Hámmárfeasttas ledje ges beare haga suohtastallame mii dagahii badjelmeare ollu rieja, dieđihit politiijat.

 

Dolat ja rakeahtat
Guovžajávrris lei muhtin cáhkkehan stuora dola mii ii lean dieđihuvvon buollinčáskadeddjiide ovdagihtii. Buollinčáskadeaddjit vuoddjájedje báikái gos dolla lei.

Politiijat iske maid ášši go muhtin báhčalii rakeahtaid viesuid guvlui. Ii muitaluvvo mii dáhpáhuvai das maŋŋel.

 

Badjelmeare gárihuvvan
Várggáin bivde dearvvašvuođabargit veahki politiijain hálddašit dievddu gii lei badjelmeare alkohola juhkan.

 

-Almmuhus-