Eai buohkat ávvudan Norgga našunálabeaivvi ráfálaččat. Nuorta-Finnmárkkus ledje sihke feastariejat ja stuimmit.
Eai buohkat ávvudan Norgga našunálabeaivvi ráfálaččat. Nuorta-Finnmárkkus ledje sihke feastariejat ja stuimmit.
Finnmárkku politiijaguovllu nuorttabeale politiijain lei olu bargu miessemánu 17. beaivvi jándora.
Váile ovttas ihkku váldui muhtin olmmoš gužžamin almmolaš báikkis Girkonjárggas, politiijat váide albmá.
Máŋggas suhtadan
Diibmu 02:44 šadde politiijat fitnat Álletnjárggas, gos guovttes leigga suhtadan. Almmáiolmmoš lei maiddái bilidan biergasiid. Politiijat fitne báikkis ja dolvo nissona ruoktot.
Váile njealjis našunálabeaivvi čuovganeapmái dieđihedje politiijat ges ahte šadde fitnat Gilevuonas gos maid leigga guovttis suhtadan ja diggon.
– Goappašagat leaba leamaš veahkaválddálaččat goabbatguoibmáska vuostá. Politiijat dutkagohtet ášši, čálle politiijat Twitteris.
Suohpáhuttai
Diibmu 04:12 šadde ges Mátta-Várjjaga politiijat johtui.
– Okta olmmoš gohččojuvvui guođđit Sandnesdalena go lei menddo gárremiin ja suohpáhuttai, dieđihedje politiijat.
Golbma feastta bissehan Čáhcesullos
Diibmu 05:18 dieđihedje Čáhcesullo politiijat ahte dan ija ledje golmma dálus šaddan fitnat bisseheamen feasttaid, go lei menddo riedja.
Lobihis vuodjin
Beal guđas iđđes váide ges politiijat muhtin mopedavuoddji, go mopedas váilo šilttat. Dát dáhpáhuvai Goađáhis.
Dan botta go politiijat ledje das, de sáhkkohedje vel guoktása geat mohtorfievrruiguin vujiiga vázzingeaidnoráigge.
– Soai dohkkeheigga sáhkuid, čálle politiijat.
Áitagat
Beal gávccis našunálabeaivvi iđđedis ožžo politiijat dieđu ahte muhtin ássanviesus lei stuibmi ja ahte muhtin lei áitán soapmása. Politiijat fitne báikkis.
