Mannan ija lei maid oalle jaskat, muhto veahá feastariejat dat gal ledje sihke nuortan ja oarjin Finnmárkkus.
Beal viđa áigge iđđes dieđihedje politiijat ahte ledje bissehan máŋga feastta Nuorta-Finnmárkkus.
Guokte Hessengas ja ovtta Sandnesas.
– Festejeaddjit gohččojuvvo mannat ruoktot, čállet politiijat.
Gárrenoaivvis vuodjimin
Váile viđa áigge iđđes dieđihedje politiijat ahte ledje bissehan muhtin vuoddji Bossegohpis. Vuoddji čájehuvvui leat gárremin.
– Varrasiskosat leat dahkkon, ášši ásahuvvon, čállet politiijat twitteris.
Báhtareigga taxi-rehkegis
Váile viđas dieđihedje politiijat maiddái ahte guokte olbmo leigga báhtaran taxi-rehkegis Hammerfeasttas.
Politiijat fitne báikkis.
– Taxivuoddji ja dát guokte olbmo šadde ovttaoaivilii loahpas, čállet politiijat.
Ártegit vujii
Dákka maŋŋil dieđihedje politiijat ges ahte sidjiide lei cavgiluvvon ahte muhtin biila orui ártegit mohkkasaddamin geainnu alde.
Politiijat iske biilavuoddji, guhte ii lean gárremiin.
– Mii giitit cavgileami ovddas, čállet politiijat.
Čiekčan biillaid
Váile guđa áigge iđđes dieđihedje ges politiijat ahte Idrettsveienis Hammerfeasttas, lei muhtin almmái čeargumin ja biillaid čiekčamin.
Politiijat ledje ožžon máŋga dieđu dán birra, ja fitne báikkis gos gávdne maid albmá.
– Jus ovttasge lea biilla roakčanan dahje eará ládje billašuvvan dán geažil, de dáhttut sin váldit oktavuođa minguin vai beassat ásahit ášši, čállet politiijat.
