Máŋgga dálus Finnmárkkus lei mannan ija leamaš feasta ja alla musihkka. Politiijat leat ferten olusiid dáhttut vuolidit musihka, dán čállá Finnmárkku politiija Twitteris.
Politiijat ožžo dieđu mannan ija veahkaválddálašvuođa birra Gitnis. Muhtin nisu 80 jagiin dolvojuvvui dearvvašvuođa iskkadeapmái go vásihii veahkaválddálašvuođa lagaš gaskavuođas. Politiijat váidet ášši.
Muosehuhttán earáid
Hámmárfeasttas gohččojuvvo politiijat golmma sullii ihkku muhtin olgobáikái mannan ija gos muhtin almmái 30 jagiin láhttii fasttit. Almmái biddjui eret olgobáikkis ja gávpotguovddážis, son váidojuvvo ráfehuhttima geažil.
Čáhcesullos finadedje politiijat, dii 02.45, muhtin ruovttus dáhttumin vuolidit musihka, doppe lei dieđihuvvon menddo jitnosit čuojaheamen.
Gužžadan almmolaš báikkis
Hámmárfeasttas váido muhtin almmái 40 jagiin gii gávnnahalai gužžadeamen almmolaš báikkis.
Musihka čuojahan jitnosit
Kirkonjárggas šadde politiijat golmma sullii ihkku gevret muhtin albmá 40 jagiin olggos muhtin olgobáikkis. Almmái lei láhtten fasttit ja muosehuhttán earáid olgobáikkis.
Hámmárfeasttas čuojahuvvui, guovtti sullii ihkku, musihkka menddo jitnosit muhtin feastavisttis gávpotguovddážis. Politiijat fidne báikkis dáhttumin ovddasvástideddjiid vuolidit musihka.
Vehá maŋŋelaš fas ožžo politiijat dieđu ahte muhtin dálus gávpotguovddážis, čuojahuvvui maid musihkka menddo jitnosit. Politiijat gávdne rabasuvssa duogábealde ja nu besse sisa gohččut vuolidit musihka.
Álttás fertejedje fas politiijat mannat muhtin dállui, dii 2.38, gos dieđihuvvui feastariedja. Go politiijat jovde báikái, ledje dušše golmmas ásodagas ja feastariedja lei jaskkodan.
Badjelmeare juhkan
Ovtta sullii mannan ija dolvo Čáhcesullo politiijat muhtin nissona ruoktot, gii lei ribahan badjelmearálaččat juhkat alkohola.
