-Almmuhus-
OĐĐASATFávle-Iččáhii biddjo kombikája 35,6 miljovnna ovddas

Fávle-Iččáhii biddjo kombikája 35,6 miljovnna ovddas

-

-

Fylkkadiggi mearridii duorastaga geassemánu 20.beaivvi golahit 41,6 miljovnna ruvnno ođđa kájaide Fávle-Iččáhii Muosát suohkanis ja Bossovutnii Stiertnás.

Fávle-Iččáhii biddjo kája masa besset leahttofatnasat gáddái mat sáhttet fievrridit biillaid. Haddi dan ođđa ráhkkanusas lea 35,6 miljovnna ruvnno.

Bossovutnii áigot ges bidjat stuorát govdunkája, mii galgá molsojuvvot eret ja buhttet dálá suohkana govdunkája.

Mearrádus lea nu go Váldolávdegotti evttohus lei, dieđiha Finnmárkku fylkkadiggi preassadieđáhusas.

 – Kombifanaskája Fávle-Iččáhii lea guhká jo leamaš dehálaš áššin sihke báikki olbmuide ja Muosát suohkanii, ja lea stuora árvu ealáhussii sullos. Mii leat hui ilus go lea ovttaoaivilvuohta váldolávdegottis ja fylkkadikkis, oažžut dakkár kája Fávle-Iččáhii, lohká váldolávdegotti jođiheaddji Geir Ove Bakken.

 

Eai leat vajálduhttán Bossovuona

Fylkkadikki mearrádus dohkkehuvvui ovttajienalaččat dán áššis.

Unnit oassi lahtuin áigo maid Bossovutnii sihkkarastit kombifanaskája, muhto dasa eai ožžon doarjaga.

– Livččiimet áinnas galgan hukset kombifanaskája Bossovutnii, muhto dán vuoru ii lean ekonomalaš vuođđu dan prošeavtta doarjut. Eat leat vajálduhttán Bossovuona, ja dat oažžu ođđa govdunkája nu ahte AltafjordXpressen boahtteáiggis galgá sáhttit leat Bossovuonas, lohká lávdegoddejođiheaddji.

 

Olu vuoruhan boaittobeal báikkiid

Máŋga fylkkadiggelahttuin celke maid ahte hattit gálvobuktimii ja mátkkálaččaide lea beare allat guovlluide gosa eai mana luottat.

 – Mii leat dahkan olu luottahis guovlluid ovddas maŋemus jagiid, go leat buoridan ja huksen olu kájaid fearggaide ja leahttofatnasiidda. Lea váttis gávdnat ruđa buot buriid prošeavttaide mat leat, muhto mii leat čađahan eará doaimmaid, nu go ovdamearkka dihte ruhtadit vuojániid doalvuma báikkiin gos eai leat feargakájat goappašat bealde, nu ahte biillaid sáhttet doalvut feargahatti mielde, ii ge gálvohatti mielde, lohká Bakken.

 

Rápmi Muosát suohkanii

Fylkkadikki mearrádusa geažil, lea maid nu ahte dán vuoru eai ge hukse kombifanaskája Muosáin. 

– Mii fertet rámidit Muosát suohkana, mii lea čájehan dáhttu vuoruhit sulloservvodaga, go áigot dohko vuosttažettiin hukset, Fávle-Iččáhii. Seammás lea dehálaš muitalit ahte mii sávvat eanet dakkár kájaid máŋgga sajis fylkkas, ja sávvat ahte eanet prošeavttat sáhttet ovdánit ođđa stuorra fylkkas, lohká Bakken loahpas.

 

Jođánit čađahit barggu

Doaibmi johtolathoavda Jørgen Blix muitala ahte hálddahus áigu jođánit bargagoahtit mearrádusain.

– Mii jáhkkit gárvet kája Fávle-Iččáhii 2020 jagi mielde, ja Bossovuona kájadoarjja galgá geahčaduvvot oktan barggus, mas áigut dárkkistit kájaid Álttávuonas, mii álggahuvvo dáid beivviid, lohká Blix.

-Almmuhus-