-Almmuhus-
OĐĐASAT– Fátmma­steapmi lea doaluid fáddá

– Fátmma­steapmi lea doaluid fáddá

Journalista

-

-

Doaimmashehttejuvvon olbmuid lihtu Norggas (NFU) jođiheaddji Kárášjogas, Berit Frøydis Svineng Johnsen, muitala vahkkoloahpa doalut álget Ingvar Brekke/Nils Peder Eriksena muitoviehkamiin lávvardaga Vuojadanáldása viesu šiljus tiibmu logis. – Heive buohkaide, sáhtát maid vázzit jus it háliit viehkat, lohká NFU jođiheaddji.

NFU doalut álget muitoviehkamiin lávvardaga ovdalgaskabeaivvi.

– Lea Nordlys čuoigan- ja valáštallanjoavku mii lágida viehkamiid. Lea gilvoviehkan, muhto sáhttá maid vázzit 5 km oassálastin dihtii. Buohkat ožžot diploma. Das maŋŋá čoahkkaneapmi Kapro ásahusas fitnodatgeainnus gos lea boradanbáiki, muitala NFU jođiheaddji Kárášjogas, Berit Frøydis Svineng Johnsen ja sávvá olu olbmot searvvašedje.

Son muitala bohtet olbmot miehtá Finnmárkku dáid doaluide. 

– Oslos boahtá NFU váldojođiheaddji Tom Tvedt. NFU lea Norgga lihttu doaimmashehttejuvvon olbmuid várás. Vásáhuslávdegotti lahttu John Cesar Johnsen muitala dán barggu birra man mihttu lea ahte sin jiena haga ii galgga mihkkege muitaluvvot. Dán lávdegoddái lea okta olmmoš juohke fylkkas válljejuvvon, muitala NFU jođiheaddji Kárášjogas, Berit Frøydis Svineng Johnsen.

Doaimmat mat heivejit buohkaide

Maŋŋá boradanáiggi muitala Kárášjoga vuodjansearvvi jođiheaddji Doris Norbye mo searvi fátmmasta buohkaid ja makkár fálaldagat sis leat doaimmashehttejuvvon olbmuide.  Maŋŋá káfestallama muitala NFU váldojođiheaddji Tom Tvedt CRPD (doaimmashehttejuvvon olbmuid olmmošvuoigatvuođa julggaštusa) birra ja mo sii lea bargamin oažžut Norgga fátmmastit dan lágas maid. Viđa áiggi muitala Olav Verstad Kapro birra ja mo sii barggu bokte fátmmastit olbmuid.

Sotnabeaivvi álget fas doalut logi áiggi Kapro viesus.

– Finnmárku spábbačiekčanbiire ja Tom Tvedt muitalit mo sáhttá buohkaid fátmmastit iešguđetlágan doaluide, lohká NFU jođiheaddji Kárášjogas, Berit Frøydis Svineng Johnsen, ja lohká olles vahkkoloahpa lea sáhka mo fátmmastit buohkaid, erenoamážit doaimmashehttejuvvon olbmuid, iešguđet lágan doaluide. 

-Almmuhus-