-Almmuhus-
-Almmuhus-
-Almmuhus-
VALÁŠTALLANFaskii MM-bronsa sáttoheaibumis

Faskii MM-bronsa sáttoheaibumis

-

-

Dán áigodaga maŋimuš heaibumiin vuittii deatnulaš máilmmimeašttir medálja. – Ledjen nu lihkolaš go vuiten, lohká Gunn Rita Boine.

Deatnulaš Gunn Rita Boine lea máhccan Romanias Norgii. Mannan vahkkoloahpa šattai son goalmmádin buoremussan máilmmis heaibumis sáddos.

 – Lei duođaid somá. Go áddejin ahte in faske golli, de in vuollánan ja baicce gilvalin vuoitit silbba dahje bronsa. Go vuiten bronsafinála de ledjen nu lihkolaš, lei nu suohtas, lohká Boine.

 

Dássi buorrána

Deanu heaibunsearvvi Gunn Rita Boine heaibbui nissoniid junior 60 kilosaš luohkás. Son lea fasken nuppi máilmmimeašttir medálja sáttoheaibumis, go diibmá vuittii nuoraidluohkás silbba.

 – Sáttoheaibuma dássi buorrána, muhto ii leat vel seamma alla dásis go dábálaš heaibun. Munnje mearkkaša dattege máilmmimeašttir medálja viehka olu. Sáttoheaibumis ferte buorre balánsa ja gilvu manná jođánit, son guhte oažžu golbma čuoggá jođáneamos vuoitá. Dát heive munnje hui bures, čilge Boine.

 

Norggameašttir

Dán jagi heaibumat álge bures Gunn Rita Boine mielas, muhto áigodaga gaskamuttus ii lihkostuvvan nu bures. Son loahpaha heaibunáigodaga dattege MM-bronsan ja NM-golliin sáttoheaibumis.

 – Norggameašttirgilvvu golli gal lei maid suohtas vuoitit, lea álo somá lihkostuvvat. Diibmá šadden Norggas nubbin buoremussan, nu ahte mun ovdánan sáttoheaibumis, mojohallá Gunn Rita Boine.

 

Movttiidahtti

Go Ávvir ságastallá Gunn Ritain, de lea son Skienis čorgestallamin ja loahpaheamen nuppi jagi Norgga valáštallanjoatkkaskuvllas. Son muitala ahte hárjehallá garrasit masá juohke beaivvi. Dál lea gearggus váldit geasseluomu, muhto dattege áigu hárjehallat vuoimmi ja givrodaga.

 – Vuoittut ja lihkostumit movttiidahttet mu joatkit sihke dábálaš heaibumin ja sáttoheaibumin. Vaikke mannan áigodat leamaš heitot, de leat mus áigumušat ođđa áigodahkii mii álgá čakčat. Mus lea mihttu vuoitit dihto heaibuid vuostá ja mun háliidivččen olahit Olympiagilvvuide, loahpaha Gunn Rita Boine.

Deanu heaibunsearvvi Gunn Rita Boine loahpaha dán jagi heaibunáigodaga sáttoheaibuma norggameašttirgilvvuid gollemedáljjain ja máilmmimeašttirgilvvuid bronsan. Govven: Deanu heaibunsearvi.

-Almmuhus-