Golmma sajis Finnmárkkus lei fas tropihkaidja mannan ija.
Davvi-Norgga geassi lei veahá maŋŋonan dán jagi, muhto dál goit báitá beaivi. Mannan ija registrerejedje maid tropihkaija 13 iešguđet báikkiin riikkas, čállá NTB.
Buorit dálkkit mat dál leat leamaš moadde beaivvi, bistet ain oanehaččat. Mannan ija ii njiedjan temperatuvra vuollelii go 20 ceahki logi sajis Nordlánddas ja golmma sajis Finnmárkkus.
– Leat leamaš liegga ijat dán maŋemus áiggi, ja boahtte ija sáhttet ain bistit tropihkaijat olu sajiin davvi-Norggas. Duorastat rájes čoaskkida veahá ja ijat dan oktavuođas šaddá ihkku maid čoaskásut, dadjá meteorologa Ragnhild Nordhagen Meteorologalaš instituhtas NTB:i.
Dás oainnát gos mannan ija lei tropihkaidja (ija čoaskásamos temperatuvra ruođuid siste):
– Flomfjord, Nordlánda (21,5)
– Sømna-Kvaløyfjellet, Nordlánda (21,2)
– Donjevuona girdišilju, Finnmárku (21,2)
– Valnesfjord, Nordlánda (21,0)
– Skrova fyr, Nordlánda (20,8)
– Bådåddjo VI, Nordlánda (20,8)
– Ájluokta, Nordlánda (20,8)
– Banak, Finnmárku (20,8)
– Glomfjord-skihytta, Nordlánda (20,3)
– Seljelia, Nordlánda (20,2)
– Straumsnes, Nordlánda (20,1)
– Báhcavuotna, Finnmárku (20,1)
– Skamdal, Nordlánda (20,0)
