270 studeantta álge Sámi allaskuvlii dán čavčča. Dat lea juste seammá lohku go diibmá. Eai leat goassege ovdal leamašan nu olu studeanttat Sámi allaskuvllas.
270 studeantta álge Sámi allaskuvlii dán čavčča. Dat lea juste seammá lohku go diibmá. Eai leat goassege ovdal leamašan nu olu studeanttat Sámi allaskuvllas.
Sámi allaskuvlla rektor Gunvor Guttorm lea duhtavaš studeantaloguin.
– Mii leat hirbmat movttegat. Diibmá lei earenoamáš buorre jahki, eatge báljo duostan jáhkkit ahte fas galggai ná bures mannat. Mis lei mihttu olahit badjel 200 studeantta, dadjá Guttorm Sámi Allaskuvlla preassadieđáhusas.
Duohta lohku alit
Lassin raporterejuvvon studeantalohkui bohtet vel studeanttat geat čađahit sierraheivehuvvon oahpu Ruoŧa bealde man Ruoŧa Skuvladoaimmahat lea ruhtadan. Nu lea duohta studeantalohku lahka 300.
Jahkásaččat gerget sullii 200 oahppi Norgga joatkkaskuvllain geain lea sámegiella juogo vuosttašgiellan dehe nubbingiellan.
– Dát buktá veháš perspektiivva man stuora oassi boahtá Sámi allaskuvlii, lohká Gunvor Guttorm.
Lohká fága seammás go lea olles virggis
Studeanta Kare Elle A. Eira lohká geabbilis praktihkalaš pedagogalaš oahpus (GPPO), seammás go bargá Guovdageainnu suohkana mánáidgárddi pedagogalaš jođiheaddjin.
– Dovddan hui lihkolažžan go bessen dán ohppui, dadjá studeanta Kare Elle A. Eira.
Sámi allaskuvllas leat olu neahttavuđot, gáiddusoahpahus, dehe nu gohčoduvvon geabbilis oahpahusat, mii lea stuora oassi manne olu studeanttat Sámis válljejit boahtit Sámi allaskuvlii. Kare Elle lea okta sis.
– Oahppu orui mu mielas nama mielde jo hui gelddolaš. Oahpaheaddjiguovttos leaba hui čehpet huksen ja heivehan oahpu studeanttaide, dadjá Kare Elle A. Eira.
Son ozai dan dihte go lea vejolaš lohkat fága seammás go olles virggis bargá. Birrasii 30 studeantta leat álgán ohppui. Kare Elle oaidná ahte dáinna oahpuin oažžu eambbo vejolašvuođaid eará bargguide ohcat.
Logaldallamat ruovttus
Studeanttat ieža čađahit máhttoháhkama earret eará digitálalogaldallamiid bokte ruovttus, go sidjiide heive.
Deaivvademiin de barget bargobihtáiguin, joavkobargguiguin ja ovdanbuktiimiiguin mat leat čadnon digitálalogaldallamiidda.
– Dát mearkkaša ahte GPPO:s jorgaluvvo máhttoháhkan nuppe ládje go dat mii lea dábálaš árbevirolaš skuvllas, gos oahpaheamis leat logaldallamat luohkkálanjas ja studeantabarggut fas leat ruovttus, čállá Sámi allaskuvla preassadieđáhusas.
