Bearjadaga bijada son Mallorcai hárjehallat ja orru doppe guokte mánu garra hárjehallama dihte.
Bearjadaga bijada son Mallorcai hárjehallat ja orru doppe guokte mánu garra hárjehallama dihte.
Anders Boine Verstad (19) áigu garrasit bargat sihkkelastimiin Mallorcas badjelaš guokte mánu. Verstad ráhkkana sihkkelastináigodahkii masa searvá dán geasi go sihkkelastá Sirpmá VS ovddas.
– Mun lean dieđihan iežan Mallorca searvái Club Ciclista Lloret de Vistalegre dan botta go lean Mallorcas, nu ahte oaččun veahki dain gilvvuin main lean mielde doppe. Sihkkelasttán dáinna servviin dan botta go lean Mallorcas, muđuid gal lea mus Sirpmá báidi badjelasas dán jagi, muitala Anders Boine Verstad.
Norggas álgá sihkkelastináigodat easka cuoŋománu 23. beaivvi, ja Verstad áigu orrut Mallorcas dassážii go áigodat álgá Norggas.
Olles áigge bargan hárjehallamiin
Anders Boine Verstad lea diimmáža rájes ollislaččat bargan sihkkelastimiin, go gearggai skuvlavázzimiin.
– Dán rádjái lean mun bures ráhkkanan áigodahkii. Buhcen ollu borgemánu ja čakčamánu, mii fas billistii mu hárjehallama, muhto dál lean fas julggiid alde ja gearggus gilvalit, dadjá Verstad.
Finai Mallorcas ovdal juovllaid
Verstad finai mánnosaštuvrras Mallorcas skábmamánu oaidnit movt doppe sáhttá hárjehallat ja plánet orruma.
– Dálvet lean ollu diimmuid hárjehallan sihkkelrullain ruovttus Kárášjogas, ja lean ovdánan logiin proseanttain iskosiiguin maid lean čađahan mannan áigodaga rájes, muitala Verstad preassadieđáhusas.
Odne lea sus maŋemus garra hárjehallan sihkkelrullain ovdal go vuolgá mátkái.
