Birrasiid logi áigge sevnnjodišgoahtá beaivváš dassái go jávká goasii oalát.
Odne suoivvanastá mannu beaivváža ovdii, nu ahte beaivváš jávká goasii oalát. Sis-Finnmárkkus dáhpáhuvvá dát birrasiid diibmu logis.
Svalbardas ja Fearasulluin sevnnjoda beaivváš oalát, dat mearkkaša ahte mánu suoivvanas oalát gokčá beaivváža.
Váralaš geahččat
Dát ii dáhpáhuva dávjá ja olbmuin dieđusge soaitá leat miella dan oaidnit, muhto dalle berre olmmoš lea várrogas. Jus áiggoš dasa geahččat de ferte geavahit erenoamáš čalbmeglásaid. Olu doaktárat várohit olbmuid geahččamis njuolga beaivvážii, čállá NRK.
– Lea váralaš geahččat njuolga beaivvážii, erenoamážit mánáide. Jus geahčat njuolga dasa de beaivesuotnjarat deivet čalmmi gođacuzzii ja moatti sekunddas boalddesta dasa hávi mat sáhttet dagahit duođalaš ja bistevaš čalbmevigiid, dadjá Vågana gielddadoavttir Jan Håkon Juul NRKii.
