-Almmuhus-
MAGASIIDNAFargga rahppo Rájácummá

Fargga rahppo Rájácummá

-

-

Jenni Laiti, Outi Pieski ja Niillas Holmberg leat ráhkadan servvošdáiddalaš barggu man gohčodit Rájácummán.

Sii leat báikkálaččaiguin ceggon sámegiel galbbaid Deanočázádahkii, main lea jurdda ráhkadit stuora geográfalaš ollisvuođa Deanočázádaga johkagierragiin gitta Deanunjálbmái. 

 

Goappatguimmešvuođas eatnamiin

Leat čieža installašuvnna johgáttiin ja Deanunjálmmis mat muitalit sámi iešstivrejumi vuođus: goappatguimmešvuođas eatnamiin, mii vuođđuduvvá gudnejahttimii, gulahallamii, geatnegasvuođaide, soabalaš ja suvdilis ovttaseallimii.

 

Dáiddabargguin višuneret ja visualiseret lunddolaš iešstivrema

– Dáiddabargu sihkasta eret stáhtarájáid ja birastahttá guovllu, man guovddážis lea Deatnu johtingeaidnun, eallima vuođđun, biebmoáitin, oktavuođaid ja gulahallama gáldun. Deanočázádat seađašii leat lunddolaš iešstivrenguovlun, ja dan háliidit dáiddabargguin višuneret ja visualiseret, lohká Outi Pieski.

Niillas Holmberg muitala ahte Iešjoga installašuvdna cealká «johka ieš min šaldi». 

– Dat vuođušta dan, ahte čázádat ovttastahttá guovlluid, olbmuid ja sogaid, iige sirre dego rádjá.
Mii sávvat ahte min dáidda árvvosmahttá olbmuid eallit eatnamiin goappatguimmešvuhtii vuođđuduvvi oktavuođas.
Ferte muitit, ahte olmmoš lea oassin ekovuogádagas.
Danin suvdilis eallinvuogit leat vealtameahttumat amamet mii liiggás noađuhit luonddu, lasiha Niillas Holmberg. 

 

Váldit vára divrras árbemáhtus 

Barggu geađgejuolgin lea leamaš gulahallan, man dáiddárat leat čađahan iešguđet guovlluid olbmuiguin.

Dáiddabargu galgá sáhkkehallat ja vihkkedallat báikkálaš sámi iešstivrejumi.

Rájacummá vuođđun lea dekolonialisttalaš višuvdna, mas sámiid iešstivrejupmi hápmašuvvá dološ viisodaga ja ođđa dieđuid deaivvadeamis. 

– Rájácummás guvlomet lea viiddis girji, mii rádjá min divrras árbemáhtu ja oahpu, mas berrešeimmet váldit vára vai birgešeimmet otná ja boahttevuođa hástalusaiguin. Dat lea reive máttuineamet midjiide, ja boahttevuođa buolvvain midjiide, dadjá Jenni Laiti. 

 

Mannan čavčča ceggen vuosttaš galbbaid

Dáiddajoavku lea mannan čavčča ceggen vuosttaš galbbaid Beahceha Rádjáčopmii. Dál leat galbbat ceagganan Áŋŋelii, Beskennjárgii, Jergulii, Leavvajohkii ja goappatbeallai Deanunjálmmi. 

Dáiddabarggu rahpan lágiduvvo Beskan Luossarockas bearjadaga 29.6 dii. 16.00 Sáttomiellis. 

Dán dieđiha Jenni Laiti preassadieđáhusas.

-Almmuhus-