Dán jagi leat 13 evttohasa Finnmárkku fylkkagieldda ássanmiellabálkkašupmái.
Finnmárkku fylkkagielda juohká jahkásaččat ássanmiellabálkkašumi. Dán jagi leat 13 evttohasa bálkkašupmái. Evttohasaid gaskkas leat sihke valáštallansearvvit, gilisearvvit, festiválat, searvvit ja ovttaskas olbmot.
Sii geat leat dáid evttohasaid evttohan ákkastallet ahte sii leat bargan earenoamáš buori barggu sin báikkálaš servodagaid ovddas.
Evttohasat leat:
- Njereveaji geaidnosearvi
- Sørøyrocken
- Maria Sotkajærvi, Ákšovuotna
- Lysthuset/Varanger Kite Center, Asbjørn Larsen bokte, Deatnu
- Billávuona valáštallansearvi Ørjan Langsholt bokte
- Hans Henrik Kristiansen, Ánnejohka
- Gjesvær Bygde- og Idrettslag
- Aronnesrocken
- Ann Kristin Kvalsvik, Áhkarvuotna
- Arne Karlstrøm, Lákkovuonbahta
- Veidnes Bygdelag
- Arne Pettersen oktan bearrašiin, Deatnu
- Bissojoga Kveanasearvi
Dahkan geasuheaddjin
Fylkkagielddas čilgejit ahte bálkkašupmi geigejuvvo soapmásii gii lea čađahan doaimmaid mat leat lokten ássanmiela, buoridan báikki beaggima ja dahkan smávvabáikkážiid Finnmárkku eanet geasuheaddjin.
Fylkkalávdegoddi mearrida dán mánu 20. beaivvi geasa dán jagi bálkkašupmi geigejuvvo.
Bálkkašupmi lea 30 000 ruvnno, dáidda ja dat geigejuvvo vuoitái/vuittiide fylkkadikki čoahkkima oktavuođas golggotmánu 12. beaivvi dán jagi.
