Fargga ilbmá čihččet «Giđđadulvi» revy 

Beaivváš Sámi Našunálateahter lea hárjehallame iežaset čihččet «Giđđadulvi» revyii, “Giđđadulvi VII”. Bihttái lea beakkán «Nytt på nytt» humorista Knut Nærum buot teavsttaid čállán.

– Mus lea bargu dál ovddasguvlui gávnnahit makkár fáttáin olbmot beroštit, makkár áššiiguin sáhttá leaikkastallat ja leat go dakkár áššit maiguin ollenge ii ábut leaikka­stallat, logai Knut Nærum Ávvirii diibmá skábmamánus, go galggai čálligoahtit bihtá.

Dál lea leaikkastallanbihttá gárvvis, ja fargga bessetge geahččit oaidnit bihtá man Knut Nærum lea válbmen.

Gos lea buoremus oažžut obbalággá?

Seammaládje go buot eará «Giđđa­dulvi» revyain, de besset geahččit dán revyas maid oaidnit árgabeaivválaš ja áigeguovdilis hástalusaid –maid eatnasat soitet ieža maid vásihan.

– Jurddaš, movt son livččii orrut Hámmárfeasttas gos buohcce­viessu lea vázzima duohken? It dárbbaš veallát ambulánssas diibmo­viissaid dahje vásihit dan mii lea vel vearrát, darvánit Suoidne­leakšái heajos dálkki geažil ja doppe válddihit obba­lággá. Na de gal baicca lea mihá buoret oažžut albma obbalággá Hámmárfeasttas, čállá Beaivváš Sámi Našunálateahter preassa­dieđáhusas čájálmasa birra.

Álgočájálmas Guovdageainnus

Čájálmasas, mas Anja Saiva ­Bongo Bjørnstad, Ingá Márjá Sarre, Mary Sarre ja Egil Keskitalo nektet, lea álgočájálmas Guovdageainnus Alfreds Kroas cuoŋománu 27. beaivvi.

Bagadallin lea Rolf Degerlund, čuojaheaddjin Roger Ludvigsen ja jietnateknihkkárin fas Olav Johan Eira.

Mánnosaš čájálmasmátki

Maŋŋel álgočájálmasa dollejit sii čájálmasmátkái. Mátkkis sii mannet birra Norgga ja bisánit máŋga guovddáš báikkiin.

Mátki álgga­huvvo Álttás miessemánu 3. beaivvi.

Nuppe beaivvi, miesse­mánu 4. beaivvi, leat sii Olmmáivákkis, miessemánu 5. beaivvi Romssas, 11. beaivvi Ohcejogas, 12. beaivvi Deanus, 16. beaivvi Oslos, 18. beaivvi Leavnnjas,
19. beaivvi Kárášjogas, ovdal go fas dollet čájálmasa Guovda­geainnus miessemánu 25. beaivvi.