Čakča lea juo dás ja dál lea farga áigi dálverieggáid fas molsut biilii. Jus leat biikkahisdálverieggát de sáhtát molsut goas ieš háliidat. Muhto jus leat biikarieggát de lea viissis beaivi goas daid sáhtát molsut.
Golggotmánu 16. beaivve rájes lea lohpi vuodjit biikarieggáiguin Norlánddas, Romssas ja Finnmárkkus.
Muđui Norggas lea easka maŋŋá skábmamánu 1. beaivvi.
Vuoddjis lea ovddasvástádus ahte biila lea doarvái coakcul oppa áigge. Dát mielddisbuktá jus siivu gáibida biikarieggáid, de fertet daid molsut ovdal dán beaivvi.
Erenoamáš čakča
Jus lea gálja de lea hui čielggas ahte lea sihkkareamos vuodjit dálverieggáiguin ovdal go geasserieggáiguin.
Jus leat biikkahisdálverieggát de sáhtát molsut goas ieš háliidat. Minsttarčikŋodat gáibádus dálverieggáide lea 3 millimehtera.
– Mis leat leamaš erenomáš lieggasat ja beaivvádagat čakčamánus, muhto golggotmánus de čoaskeda, ja dalle šaddet maid gáljanat, dadjá Johtolat – ja mohtorfievroossodaga ossodatdirektevra Jørn Simonsen, Stáhta geaidnodoaimmahagas Davvi regiovnnas.
Geahča dálkedieđáhusa
Jus lea dieđihuvvon muohtti, gáljasiivu dahje čoaskásat dan guvlui gosa leat jurddašan vuodjit, dalle sáhtát molsut biikarieggáide ovdal golggotmánu 16.beaivvi davimus fylkkain ja ovdal skábmamánu 1.beaivvi máddin.
