Badjel 50 000 norgalačča fertejit ođasmahttit iežaset vuodjenkoarttaid.
Buot biilavuoddjit, geain leat vuodjenkoarttat mat leat stuorábut go báŋkokoarttat, fertejit daid ođasmahttit ovdal ođđajagi. Dalle eai leat šat stuora plastihkkalaminerejuvvon vuodjenkoarttat dohkálaččat. Daid vuodjenkoarttaid juhke biilavuddjiide ovdal 1998.
– 50 000 biilavuoddji eai leat vel ođasmahttán vuodjenkoarttaid. Dál lea áigi dan dahkat jus ain áigu bisuhit vuodjenlobi maŋŋel ođđajagi. Mii sávvat ahte eatnasat bohtet ođasmahttit vuodjenkoartta dán mánus. Jus vuordá gitta juovlamánnui, de ii soaitte oažžut ođđa vuodjenkoartta áiggil, lohká Stáhta geaidnodoaimmahaga ossodatdirektevra Lill Tove Amundsen preassadieđáhusas.
Davvi-Norggas fertejit badjel 4000 biilavuoddji ođasmahttit iežaset vuodjenkoarttaid. Olbmot geat dárbbašit ođđa vuodjenkoartta galget diŋgot áiggi muhtin Stáhta geaidnodoaimmahaga johtolatkantuvrrain. Go vuolgá ođasmahttit vuodjenkoartta, de ferte muitit váldit fárrui legitimašuvnna.
Jus ii ođasmahte biilavuodjenkoartta, de massá vuodjenlobi dassážii go dan lea ordnen.
