Finnmárkkumeašttirgilvvut fidnofágas ja oahppo- ja ealáhusdoaibmaseminára lágiduvvojit dán jagi ovtta ja seamma beaivvi Girkonjárgga joatkkaskuvllas. Ulbmil lea eambbo oažžut oahppošiehtadusaid ja eambbo ohcciid.
Finnmárkkumeašttirgilvvut fidnofágas ja oahppo- ja ealáhusdoaibmaseminára lágiduvvojit dán jagi ovtta ja seamma beaivvi Girkonjárgga joatkkaskuvllas. Ulbmil lea eambbo oažžut oahppošiehtadusaid ja eambbo ohcciid.
Guovvamánu 15. beaivvi lágiduvvo meašttirgilvu mas válljejuvvojit fidnofágameaštárat 15 iešguđet fágas.
Meašttirgilvu lea dán jagi oktanas skuvlla jahkásaš oahppo- ja ealáhusdoaibmaseminárain, gos sihke ealáhusdoaibma, Mátta-Várjjaga nuoraidskuvllaoahppit, oahppoinstitušuvdna ja skuvlla oahppit finadit.
Oahppošiehtadus gilvvus
Gilvvuid mediavásttolaš, Stig Nytun, muitala ahte skuvlagilvu sáhtta leat gaskaoapmin oažžut eambbo ohcciid fidnofágaide. Ahte gilvu buktá eambbo oahppošiehtadusaid, gal lea juo čájehuvvon.
– Mii leat vásihan ahte oahppit leat ožžon oahpposadjefálaldaga gilvvus, dadjá Nytun preassadieđahusas.
– Gilvu lea buorre čájáhuslávdi fidnofágaohppiide, ja fitnodagat finadit skuvllas ohcan dihte boahttevaš mielbargiid. Oahppit besset čájehit sihke iežaset ja maid máhttet. Sávvamis dagaha dát dasto eambbo ohcciid fidnofágaide, eambbosat čađahit oahpuideaset ja eambbo oahpposajit šaddet.
Finnmárkkujoavku
Oktiibuot galget 52 fidnofágaoahppi gilvvohallat ja fágaolbmot leat lágideaddjit ja duopmárat.
Vuoitit dagahit Finnmárkkujoavkku sihke skuvla-NM:s ja skuvlagilvvus Arctic Skills, gos Finnmárkkuoahppit galget gilvvohallat Ruošša ja Suoma ohppiiguin. Arctic Skills lea Tornios dán jagi.
Guovdageainnu ovddasteaddji
Mikal Kemi lei mielde skuvlagilvvus mii lágiduvvui ođđajagemánu, ja beassá ovddastit Sámi joatkkaskuvlla ja boazodoalloskuvlla Girkonjárggas.
– Lei buorre dovdu geargat, ja gullat ahte beasan ovddastit min skuvlla, dajai Mikal Ávvirii maŋŋel skuvlagilvvu.
