Odne lea maŋemus vejolašvuohta máksit jahkedivada, ovdal dieđihit dovdomearkkaid eretváldima.
Odne lea maŋemus vejolašvuohta máksit jahkedivada, ovdal dieđihit dovdomearkkaid eretváldima.
Guovvamánus sáddii Duollodoaimmahat 3,6 milliuvnna jahkedivada máksingáibádusaid mas máksináigemearri lei cuoŋománu 10.beaivvi. 305 000 gáibádusa eai leat mákson rievttes áigái, ja Duollodoaimmahat lea sádden ođđa muittuhusa. Jahkediva buktá ollislaččat 9,6 milljárdda sisaboađu stádakássii, ja lea 780 milliuvnna mii ii leat vel mákson.
Maŋemus áigemearri odne
Sii geat eai leat máksán gáibádusa dahje máksán gáibádusa beare maŋŋit ožžot ođđa gáibádusa. Sii fertejit lassimávssu máksit, ja miessemánu 6.beaivvi lea mearri biddjon. Jus jahkediva dahje lassidiva ii leat mákson dán áigemearis, de mearrida Duollodoaimmahat váldit eret dovdomearkkaid biillas.
Eanet vuojánat Guovdageainnus
Guovdageainnu suohkanis leat eanet vuojánat olmmošlogu ektui go ránnjágielddas Kárášjogas, ja Guovdageainnus leat eambbogat njoazit máksit ovdal áigemeari. Guovdageainnus leat vealgugasat 876 040 ruvnno divvagiid ovddas, ja Kárášjohkalaččat ges 637 134,50 ruvnno. Guovdageainnus mákset milliuvnna eanet go Kárášjogas lassi vuojániid dihte.
Ávjuvárri gielddain
Porsáŋggus leat čeahpimusat máksit Ávjuvári gielddain gos 9,78 proseanta eai leat áiggis máksán. Kárášjogas leat 10.98 proseanta ja Guovdageainnus leat 12,47 proseanta maŋŋonan máksimiin.
Olles Finnmárkkus leat jahkediva oktiibuot 14 432 741,50 ruvnno mii ii leat mákson.
Jus it leat sihkar leat go máksán jahkedivada, de sáhtát dáppe iskat dan.