-Almmuhus-
KULTUVRAFargga besset stáluin gilvalit

Fargga besset stáluin gilvalit

-

-

Sámi mánát galget dáid juovllaid 15 TV-prográmmas gilvalit stáluin.

«Stálugilvvut» lea NRK Sámi Mánáid-TV gilvoprográmma, mii lea ráhkaduvvon 7–12-jahkásaš mánáid várás. 15 prográmmas leat 30 máná gilvaleamen ja sii bohtet Romssas, Deanus, Ohcejogas, Gáregasnjárggas, Kárášjogas ja Gironis.

Álgoprográmmas gilvaleaba Kárášjoga mánáguovttos Tommy Aleksander ja Mariela.

Prográmmas besset mánát vásihit maid livčče dahkan jus stállu livččii suoládan sin juovlaskeaŋkkaid, livčče go vuollánan ja ávvudan juovllaid skeaŋkkaid haga?

Nu eai daga gal Mánáid-TV Stálugilvvuid roastilis mánát. Sii ohcet stálu ja hástalit su gilvui. Fidnen dihtii skeaŋkkaid ruovttoluotta, de fertejit vuoitit gilvvuid. Jus vuoittáhallet, de šaddet stálu biigot, reŋgot agibeaivvi.

 

Stálugilvvuid vuosttaš prográmma lea juovlamánu 9. beaivvi, ja ráidu bistá gitta ođđajagemánu 1. beaivái, ja čájehuvvo vuossárggas bearjadahkii NRK Superis.

 

-Almmuhus-