-Almmuhus-
-Almmuhus-
-Almmuhus-
OĐĐASATFargga beasat diehtit oaččut go vearroruđaid ruovttoluotta

Fargga beasat diehtit oaččut go vearroruđaid ruovttoluotta

-

-

Vearrodieđáhus sáddejuvvo juste ovdalaš beassážiid. De beasat diehtit šattat go máksit lassivearu, vai oaččut go ruđaid ruoktot.

Cuoŋománu 4. beaivvi sádde Vearroetáhta vearrodieđáhusa.

Dan beaivvi rájes gávnnat gaskaboddosaš loguid vearus. Sisadieđihanáigemearri vearrodieđáhusas lea cuoŋománu 30. beaivvi.

– Ođđa dieđihanvuogádagat leat anus ja máŋga láhkarievdadusa leat váikkuhan min vuogádagaid, nu go vearrohálddašanláhka. Dan oktavuođas dárbbašit lassi áiggi kvalitehtaiskosii. Badjel 75 proseantta olbmuin ožžot vearrodieđáhusa elektrovnnalaččat ja besset iskat loguid cuoŋománu 4. beaivvi rájes, čállá Vearrodirektoráhta preassahoavda Merete B. Jebsen e-boasttas Vearromáksiidsearvái.

 

Sáhtát ohcat maŋidit

– Leat ollugat geat dárbbašit veahki go galget deavdit vearrodieđáhusa, ja jus sii ožžot dieđáhusa dušše báberhámis, de lea unnán áigi iskat buot dieđuid. Dat ii leat buorre, lohká Vearromáksiidsearvvi fágahoavda Rolf Lothe.

Birrasii miljovnna vearromáksi ožžot ain vearrodieđáhusa báberhámis, ja sii sáhttet šaddat vuordit maŋŋel beassážiidda ovdal go besset iskat loguid.

– Jus vearromáksit eai oaččo doarvái áiggi iskat vearrodieđáhusa, de sáhttet ohcat maŋiduvvot áigemeari, muitala Jebsen.

 

Rievdan njuolggadusat

Leat máŋga ođđa rievdadusa vearrodieđáhusas.

– Rievdadanvejolašvuođat, áigemearit, ráŋggáštusapparáhtta, ja eanet ovddasvástádus juohkehaččas ahte dieđiha rievttes dieđuid lea ođas, muitala Regnskap Norge advokáhtta Per-Ole Hegdahl Nettavisenii.

– Dasa lassin sáhtát dán jagi rájes ieš dahkat rievdadusaid cuoŋománu 30. beaivvi rájes. Jus leat vajáldahttán ieš dieđihit dietnasa dahje opmodaga, de it dárbbat sáddet váidaga Vearroetáhtii. Don sáhtát ieš mannat digitála vearrodieđáhussii ja doppe rievdadit dieđuid, muitala Hegdahl.

Vearroetáhta sádde olbmuide e-boasta dahje sms-dieđu go vearrodieđáhus lea gárvvis.

 

Vuosttaš vearrorehketdoallu gárvána geassemánu 21. beaivvi, ja dađistaga gárvánit rehketdoalut gitta golggotmánu 25. beaivái.

-Almmuhus-