Sotnabeaivvi lea maŋemuš áigemearri sáddet vearrodieđáhusa, penšunisttaide ja bargoolbmuide.
Golbma miljovnna bargoolbmo ja penšunistta leat juo rahpan vearrodieđáhusa, muhto leat ain 400 000 olbmo geat eai leat. Dan dieđiha Vearroetáhta preassadieđáhusas.
– Muitte ahte vearrodieđáhus lea ovdagihtii devdojuvvon, muhto ii fal gárvvisin. Várre áiggi, ja iskka leat go buot dieđut riekta, ávžžuha Vearroetáhta preassahoavda Merete Bergeland Jebsen.
Jus buot dieđut leat riekta, de ii dárbbaš sáddet dieđáhusa.
Lea vuosttaš háve go Vearroetáhta sádde unnit go miljovnna vearrodieđáhusa báberhámis. Dán jagi leat 925 000 geat ožžot vearrodieđáhusa báberhámis.
Boasttu gessosat
Okta boasttuvuohta mii lea dávjá vearrodieđáhusain, lea geasus maid oažžu mátkki ruovttu ja bargobáikki gaskka, ja geasus jus guhkes mátki lea juohke beaivvi.
Lea okta juohke logádis gii dahká boastut.
– Maŋemuš jagiid leat mii bures dárkkistan, ii leat buorre jurdda geahččalit gáibidit gessosiid maidda ii leat riekti, lohká Jebsen. Son čilge ahte sin neahttasiidduin leat čilgehusat ja kalkuláhtorat maid sáhttá veahkkin atnit.
