Sámediggi ja ealáhusorganisašuvdna Bivdu leat ožžon dohkkehuvvot sávaldaga lasihit fanasbivdoeari riddoguolástusortnegis 4,5 tonna dorskiin juohke fatnasii.
Sámediggi ja Bivdu bivddiiga ovdal beassážiid Guolástandirektoráhta lasihit fanasbivdoeari riddoguolástusortnegis 4,5 tonna dorskiin juohke fatnasii. Bearjadaga cuoŋománu 22. beaivvi bođii diehtu doarjaga birra guolástusdirektevrras ahte juolluduvvo maksimála bivdoearrelasáhus 4,5 tonna dorskiin fatnasiidda mat servet riddoguolástusortnegii.
Dán čállá Sámediggeráđđi preassadieđáhusas.
Diibmá eai lihkostuvvan
Sámediggepresideanta Silje Karine Muotka (NSR) oaivvilda dehálažžan sihkkarastit ahte riddoguolásteaddjit sámi guovlluin duođai besset deavdit hivvodaga mii sidjiide lea addojuvvon.
– Diibmá ii lihkostuvvan dađi bahábut bivdit buot dorski riddoguolástusortnegis, muhto lihkus nákciimet fievrridit 800 tonna dán jagi bivdomearrái, dadjá Muotka.
–Sávvamis ávkkálaš
Dainna duogážiin man olu dorski lea bivdojuvvon dán rádjái bivdoáigodagas rabas joavkkus, de leat sihke Sámediggi ja Bivdu árvvoštallan ahte ferte dál juo láhčit vejolašvuođa dasa ahte dat unnimus fanasjoavku oažžu lasihuvvot iežas eriid, nu ahte joavkoearit bivdojuvvojit dál go guolli ain lea lahka gátti ja dan botta go leat buorit dálkedilálašvuođat.
– Nu go hattit leat dál, de sáhttet dákkár lassiearit addit sullii 100 000 ruvnno lassidietnasa dorskebivddus, ja dat sávvamis lea hui ávkkálaš ollu riddoguolásteddjiide sámi guovlluin, loahpaha Muotka.
