Guovdageainnu suohkan fállá veahki ja doarjaga sidjiide geaidda guohtunroassu čuohcá.
– Suohkana NAV, doavtterkantuvra ja ealáhusossodat fállet veahki jus boazodoalus oktage dan dárbbaša, čállá Guovdageaidnu suohkan.
– NAV-sosiála sáhttá veahkehit jus leat ekonomalaččat váttis dilis. Lea dušše okta ohcanskovvi man fertet deavdit jus áiggut ohcat go dárbbašat ekonomalaš doarjaga. Sáhtát ohcat doarjaga ovdamearkka dihte: viessogoluide nu mo viessoláigui, elrávdnjegoluide, liggemiid, suohkanlaš divadiidda, oastit biepmu, bátnedoaktárgoluide, oastit biktasiid, astoáiggedoaibmagoluide ja nu ain eará goluide, dieđiha suohkan.
Dearvvašvuođabálvalus
Guovdageainnu doavtterkantuvra fállá beaivvát ala veahki boazodolliide geat dárbbašit jođánis dearvvašvuođaveahki.
– Psyhkalaš dearvvašvuođaossodahkii lea maid álki oažžut diimmu oanehis áiggis, čállá suohkan.
Ealáhusossodat
Guovdageainnu suohkanis lea sierra heahtefoanda mii lea heivehuvvon boazodollui mii dál lea váttis dilis. Vahkku 15:s rahppo vejolašvuohta ohcat doarjaga doppe.
Skuvla
Buot ovddasteddjiide rahppo vejolašvuohta čuovvut váhnenčoahkkimiid ja ohppiidságastallamiid Teams bokte olles dán skuvlajagi.
Biedjovággeluotta rahpat
Suohkan lea ovttasráđiid Sámedikkiin geahččame vejolašvuođa rahpat ja doalahit rabas Biedjovákkeluotta.
Ovttasbargočoahkkin boazodoalloealáhusain
Sátnejođiheaddji lea bovden ovttasbargočoahkkimii gos dát bajábealde namuhuvvon čuoggát ja eará áigeguovdilis áššit galget digaštallot.
Buot dieđuid Guovdageainnu suohkana veahkkefálaldagaid birra gávnnat dás.
