Guovdageainnu suohkana fágarasttildeaddji joavku fállá dál veahki váhnemiidda, mánáide ja nuoraide koronadávdda geažil.
Guovdageainnu suohkanis lea fágarasttildeaddji joavku mas leat mielde suohkana psykologat, dearvvašvuođastašuvdna, PPT ja mánáidsuodjalus.
Ii leat dilli rievdan
Maŋŋel go Norga válljii giddet buot skuvllaid ja mánáidgárddiid, de lea čájehuvvun ahte fuolastusdieđut mánáidsuodjalusaide leat njiedjan.
Guovdageainnu mánáidsuodjalusa jođiheaddji Berit Annette Hætta muitala ahte Guovdageainnus ii leat dilli fuolastusdieđuid ektui rievdan.
– Mii eat oainne gal ahte leat boahtán eambbo fuolastusdieđut go ovdal, dat lea seamma dásis go ovdal, muitala Hætta.
Dollet vahkkosaččat čoahkkimiid
Guovdageainnu suohkana fágarasttildeaddji joavku doallá dál vahkkosaččat čoahkkimiid mánáid ja nuoraid várás geat soitet leat earenoamáš rašes dilis.
– Mii leat sádden dieđu iežamet fálaldagaid birra buot suohkana skuvllaide ja mánáidgárddiide, ja sii de sáddejit dan seamma dieđu viidásit mánáide, nuoraide ja váhnemiidda, muitala Hætta.
– Mii diehtit ahte dat áigi sáhttá leat lossat ja hástaleaddjin buohkaide, go buohkat leat ruovttus ja váhnemat soitet váibat, nuvt mii hálidit de fállat veahki buot mánáide, nuoraide ja váhnemiidda, muitala Hætta.
Veahkki maid fállet
– Veahkki man mii sáhttit fállat lea ahte mii sáhttit árvvoštallat rahpat mánáidgárddiid ja skuvllaid mánáide ja nuoraide geain lea earenoamáš dárbu dasa. Mii fállat maid duddema, bagadallama ja ságastallama, ja heivehit veahki dan ektui makkár dárbu guđes ge lea, muitala Hætta.
Hætta ávžžuha buohkaid, geain lea lossa dilli dál dahje dovdet dárbbu hupmat jus árgabeaivi buktá liigehástalusaid, váldit oktavuođa. Hætta lohká dan fálaldaga leat vuosttašceahkkefálaldahkan.
Riŋget dahje čállit SMS
– Minguin sáhttá váldit oktavuođa telefuvnna bokte, riŋget dahje čállit SMS, muitala Hætta.
Hætta muitala maid ahte sáhttá váldit oktavuođa SÁNAG:in go sis lea maid fálaldat.
– Guovdageainnu dearvvašvuođastašuvnnas lea Snapchat-kontu mainna maid sáhttá váldit oktavuođa, ja muđui gávdná min fágarasttildeaddji joavkku telefovdnanummariid suohkana neahttasiiddus, loahpaha Hætta.
