Hámmárfeastta suohkan oaidná dárbbu ásahit sierra foruma nuoraide.
Našunála logut čájehit ahte leat nuorat geat leat bajimuččas koronastatistihkas. Dat guoská gaskal 13- ja 19- jahkásaččaide. Hámmárfeastta suohkan dohppe hástalusa ja lágidišgohtet sierra preassačoahkkima sidjiide.
– Faláldat lea erenomážit dien ahkejovkui, muhto earát maid sáhttet dieđus čuovvut dan. Mihttu dainna lea ahte dat ahkejoavku galget oažžut vástádusa pandemiija birra, dadjá Hámmárfeastta sátnejođiheaddji Marianne Sivertsen Næss vuossárgga preassačoahkkimis.
Oahppit erremis
Hámmárfeasttas lea guoktásii njommon korona mannan vahkkoloahpa, joatkkaskuvlla oahppái ja buohcceviesu bargái. Oahppis lea čanastat oahppái geas lea duođastuvvon ovddežis korona. Soai gazzaba oahpu seamma luohkás. Logi oahppi ja vihtta oahpaheaddji leat biddjon erremii dál.
Logut
Odne lea Hámmárfeasttas gávcci olbmos korona ja 124 olbmo leat erremis. Oktiibuot leat 386 olbmo iskojuvvon mannan vahkus. Čavčča rájes lea51 olbmos leamaš korona suohkanis.
