Fállet máŋggabealat prográmma

– Dán jagi fáddá lea «Lákkovuotna – giláš gos kultuvrrat deaivvadit». Go mis leat dán unna gilážis kvenat, sápmelaččat ja dážat, lohká Ottesen.  

– Mis lávejit fitnat dán vahkus báikeolbmot, eará giliid ássit ja boazosápmelaččat geain leat geasseorohagat dáppe guovlluin. Dan dihte heivii dát fáddá nu bures, čilge Ottesen. 

Deaivvadan báiki

Dadjá sin doalut leat šaddan kultuvrralaš deaivvadanbáikin. 

– Lea hirbmat somá go deaivvadit, ja soitet vel ođđa oahppasat gártat dán vahkkus, dadjá Ottesen movttegit. 

Ottesen muitala sii geahččalit prográmma ráhkadit stuorisin ja máŋggabealálažžan vai lea juoga mii heive buohkaide geat bohtet doaluide. 

– Lea maid nu ahte go kultuvrrat deaivvadit, de lea hui somá oaidnit ja gullat mo kulturdeaivvadeamit doibmet geavatlaččat, lasiha Ottesen. 

Stuorru jagis jahkái

– Mii oaidnit ahte doalut sturrot jagis jahkái. Danin lea ge nu somá olles vahkku lágidit doaluid dáppe, dadjá Ottesen. 

Muitala sis leat olles vahku nu olu doaimmat mii galggašii heivet juohkehažžii.

– Doaivvun dainna lágiin mii geasuhit oallugiid, lasiha Ottesen. 

Šaddat eanet dihtomielalaččat

Ottesen muitala jurdda lea maid ahte olbmot galget šaddat eanet dihtomielalaččat ja ovddidit kultuvrraid mat leat Lákkovuonas. 

– Olbmot dán gilis leat kulturguoddit. Go sii dan atnet muittus, de šaddá mis vel buoret oktavuohta ja ovttasbargu, čilge Ottesen. 

Lohká sis lea jurdda čalmmustahttit kultuvrraid buorre mielalaččat.

– Mis leat prográmmas guođoheaddjigilvu, sámegielat teáhter mánáide, dáiddačájáhus mas leat sámi dáiddárat, oahppat málestit kvena biepmuid, sámi ja kvena eahkedat ja ollu eará, muitala son. 

Bovden politihkkariid

– Aili Keskitalo fitná mánnodaga min doaluin.  Šaddá hirbmat gelddolaš, muitala Ottesen. 

Guovdageainnu, Álttá, Návuona ja Láhpi sátnejođiheaddjit leat maid bovdejuvvon doaluide.

Lohká muhtin sátnejođiheaddjit leat vástidan. 

– Min mielas ii leat dát dušše báikkálaš ovttasbargu, muhto mii gulahallat maid suohkanrájiid rastá. Danin mearrideimmet dán jagi bovdet sátnejođiheddjiid doaluide, čilge son. 

Doaivu sii bohtet

Ottesen čujuha ahte oktavuohta dážaid, sápmelaččaid ja kvenaid gaskkas gieđahallo maiddái suohkan dásis ja fylkkaid dásis. 

– Danin sávan ahte maiddái sin bealis bohtet olbmot min doaluide, ja nu čájehit ahte mis lea buohkain buorre oktavuohta, loahpaha Ottesen. 

– Mun doaivvun sii bohtet buohkat min doaluide, lohká Ottesen.