Guovdageainnu suohkana NAV Sosiála bálvalus fállá ekonomalaš bagadallama buohkaide. Bálvalusa ulbmil lea eastadit vealgeváttisvuođaid, buoridit geavaheddjiid ekonomalaš diliid ja veahkehit olbmuid šaddat iešbirgejeaddjin.
Oallugat vásihit dál ahte sin ekonomalaš dilli hedjona. Olu lea divron ja reanttu loktanan, juoga mii sáhttá dagahit gáržžit ekonomalaš dili ja ruđalaš hástalusaid.
— Dus eai dárbbat leat stuora ekonomalaš váttisvuođat ovdal válddat oktavuođa. Jus dus leat gártan olu rehkegat, iige soaitte áibbas obbalašgovva iežat ekonomalaš dilis, de váldde jođáneamos lágiin oktavuođa, čállá Guovdageainnu suohkan.
Ekonomiija- ja vealgeráđđeaddin
NAV-kantuvrras sáhttá ekonomiija- ja vealgeráđđeaddi veahkehit. Earret eará sáhttá ráđđeaddi veahkehit:
– Kártet du ekonomalaš dili – Gávnnahit mot unnidit du olggosgoluid – Dahkat šiehtadusaid singuin geaidda dus lea vealgi – Gávdnat dieđuid du rivttiid ja geatnegasvuođaid birra – Váldit oktavuođa bággoberiin – Ohcat vealgeortnega Gáldu: Guovdageainnu suohkan
Nuvttá fálaldat
Vealgeráđđeaddi sáhttá addit viidát bagadallama, ja veahkehit kártet du ekonomalaš dili. Jus leat duođalaš ekonomalaš váttisvuođat de NAV Guovdageaidnu ovttasbargá vealgegelbbolašvuođa guovddážin. Gelbbolašvuođa guovddáš sáhttá veahkehit šiehtadallat velggoheddjiiguin ja geahččalit gávdnat buriid čovdosiid dutnje. Fálaldat lea nuvttá, čállá suohkan.
