Norgga valáštallanlihttu fállá buot valáštallanservviide nuvttá lágidit jahkečoahkkimiid digitála vuogi mielde.
Norgga valáštallanlihttu, Norges idrettsforbund (NIF), dieđiha preassadieđáhusa bokte, njukčamánu 31. beaivvi, ahte dán erenoamáš korona áiggi dilis, leat olu valáštallansearvvit mat eai sáhte lágidit jahkečoahkkimiid nu mo lávejit. Veahkehan dihtii sin, de fállá NIF nuvttá čovdosa servviide vai sáhttet lágidit jahkečoahkkimiid.
– Mii leat hui ilus go sáhttit fállat buot NIF valáštallanservviide Idrettens Office 365 áibbas nuvttá suoidnemánu álgui. Dáinna vugiin eai dárbbaš valáštallansearvvit čohkket dievva olbmuid ovtta báikái lágidan dihtii jahkečoahkkima, čilge NIF váldočálli Karen Kvalevåg.
Son čilge ahte dát reaidu, Idrettens Office 365, mii gávdno idrettsforbundet.no čujuhusas, addá servviide vejolašvuođa vurket ja heivehit dokumeanttaid ja čoahkkinastit digitála vuogi mielde. Bagadallančálus lea fargga gárvvis.
