-Almmuhus-
OĐĐASATFállet 100 miljovnna unnit go NBR gáibida

Fállet 100 miljovnna unnit go NBR gáibida

-

-

Stáhta lea geigen iežas fálaldaga  boazosápmelaččaide. Fálaldat lea 139,3 miljovnna ruvnno, mii lea masá 100 miljovnna unnit go Norgga Boazosápmelaččaid Riikkasearvi lea gáibidan. 

Guovvamánu 5. beaivvi geigii Eanadoallo- ja biebmodepartemeanta iežaset boazodoallošiehtadusa  2020-2021 fálaldaga Norgga Boazosápmelaččaid Riikkasearvái (NBR). Stáhta fálaldat  lea 139,3 miljovnna, mii lea 97,3 miljovnna unnit go NBR lea gáibidan.   Lea 3,2 miljovnna eambbo go jagi 2019 šiehtadusas. 

 – Lea dieđusge hástaleaddji go lea nu stuorra gaska min gáibádusas ja stáhta ekonomalaš fálaldagas. Dat dagaha váttisvuođaid go galgat čađahit vuoruhemiid mat leat ealáhusas, ja seammás go mii konstateret ahte dat fáladat dagaha ahte erohusat sturrot go buohtastahttá sullasaš ealáhusaiguin, dadjá NBR jođiheaddji Ellinor Marita Jåma preassadieđáhusastis. 

Loga maid: Boazodoallošiehtadus geigejuvvo stáhtii

Digaštallat fálaldaga 

Son čállá viidásat ahte eai leat dušše ekonomalaš hástalusat stáhta fálaldagas. 

– Lea hui hástaleaddji maid  go stáhta  ii mieđit NBR vuoruhemiid. Sáhtán erenomážit namuhit gáibádusa ásahit boazofágalaš plánakonsuleantavirggi mii galgá veahkkin boazoeaiggádii areálaáššiin. NBR šiehtaduslávdegoddi áigu digaštallat stáhta fálaldaga riikastivrrain ja báikkálaš seavrvi jođiheddjiiguin boahtte vahkus, oažžun dihtti vuođu mo mii galgat viidásat šiehtadallat, dadjá Jåma.

Vuosttaš šiehtadallančoahkkin lea Oslos guovvamánu 12 ja 13. beaivvi. 

-Almmuhus-