-Almmuhus-
OĐĐASATFállá hukset vázzingeainnu vai beassá cegget ásodagaid dása

Fállá hukset vázzingeainnu vai beassá cegget ásodagaid dása

-

-

Viessohuksejeaddji Ulf Kivijervi lea ohcan sierra lobi márkanplánas Guovdageainnus, go háliida ­cegget gávcci áibbas ođđa ásodaga márkanbáikái, muhto ii beasa vuos álgit huksegoahtit.

Ulf Kivijervi lea pláneme cegget stuora vistti iežas eatnama ala, mii lea Guovdageainnu márkanbáikkis, skuvlla ja suohkanviesu gaskkas.

Eatnamis lea dál boares viessu, maid son pláne gaikut ovdal go hukse ođđa, stuora vistti ja garášaid.

– Dat lei eana maid mun árbejin iežan áhčis, ja das lea hui boares viessu dál, mii lea ceggejuvvon dasa maŋŋel soađi, lohká Ulf Kivijervi Ávvirii.

 

Suohkan hilggui ohcama

Diibmá geasset ozai Ulf Kivijervi sierralobi suohkana márkanplánas, oažžut lobi hukset vistti mas leat gávcci ásodaga, muhto ii ožžon dohkkehuvvot ohcama go spiehkastii márkanplána ektui.

Suohkanis jáhkket vejolašvuođa rahpasit earáide ohcat sierralobiid areálaplánas, čuožžu čállon áššebáhpiriin.

Nubbi ákkastallan plánaid vuostá lea maid ahte dat luodda mii geavahuvvo Kivijervi vissui, geavahuvvo maid skuvlamánáin geat vázzet skuvlii, ja muđuid vudjet biillat vel das go mánáid sáhtostallet skuvlii.

Dasa gal oaidná Kivijärvi ráđi, ja lea buktán ođđa evttohusa, muitala son Ávvirii.

 

Ráhkada vázzingeainnu

Kivijervi lohká iežas váidán suohkana hilguma, ja evttoha dál iežas ráhkadit vázzingeainnu skuvllamánáide.

– Mii háliidit hukset vázzin­geainnu suohkanviesu ja min huksenbáikki gaskii, vai sihkka­rvuohta lea sajis mánáide go mannet skuvlii.

Bearjadaga cuoŋománu 26.­­beaivvi lea áigemearri buktit cealká­muša huksenplánaide suohkanii.

Kivijervi mielas lea gelddolaš oaidnit bohtosa ja sávvá ge ahte meannudeapmi ii ádján vai beassá hukse­goahtit.

– Ášši lea nu, áigut hukset ásodagaid nu hálbin go vejolažžan, de leat áigon bargat dán vuogi mielde. Lea boares viessu das, ja háliidan cegget ásodagaid maid ii galgga leat beare divrras osttiide, čilge son.

 

Buorre gulahallan

Juohke ásodat lea 88 kvadráhtamehtera stuoris ja leat guokte oađđenlanja juohke ásodagas. Maiddái garášat galget hukse­juvvot dan eatnamii.

Kivijervis lea buorre doaivva ahte ášši ovdána, ja gulahallama lohká leamaš buorren suohkaniin.

– Mis lea čađat áigge leamaš hui buorre gulahallan suohkaniin nu go ráđđealbmáin, sátnejođihed­djiin ja teknihkalaš hoavddain, lohká son.


GÁVCCI ÁSODAGA: Dákkár ásodaga ja garáša lea Ulf Kivijervi AS pláneme cegget Guovdageainnu vuođđoskuvlla lusa, mii lea hui gasku márkanbáikki.
Arkiteaktagovva: Atelier 2 AS, arkiteakta Sia Peter Maisenhölder.

 

Plána vuovdit ásodagaid

Ránnját eai leat addán vuoste­cealkámušaid plánaide, ja lagamus ránnjá lea bivdán cegget beannot mehtera alu áiddi, iežas ja Kivi­jervi eatnama gaskii.

– Dál lean vuordime ođđa mearrádusa dan váidagii maid lean addán suohkanii go hilgo mu ohcama, lohká Kivijervi, ja lasiha:

– Guovdageainnus lávejit áššit ádjánit vehá guhká. Ferte dušše leat gierdevaš, lohká son.

Go Kivijervi lea ceggen ásodagaid, de lea plána vuovdit daid, ja priváhta olbmuin sáhttá maid vejolašvuohta oastit ásodaga alcces.

 

Doarju Kivijervi huksenplána

Suohkana sátnejođiheaddji Johan Vasara (Bb) lohká iežas doarjut Kivijervi huksenplánaid.

– Mun lean hui positiiva su huksenplánaide. Su plánat vástidit dárbbuide maid oallugat min suohkanis leat ohcalan, ásodagaid oastin ládje márkanguovddážis. Dasa lassin diehtit ahte eana
lea čužžon guorosin ja geavat­keahttá olu jagiid, nu ahte buorre jus dál váldo atnui, lohká Vasara.

Sátnejođiheaddji lohká dás leat dieđusge formalitehtat maid ferte čuovvut, muhto sávvá álkes ja jođánis čovdosa prošeavtta ektui.

– Nu mot mun oainnán, de lea vázzingeaidnu sin beales fálaldat buori guvlui, go dat buorida sihke johtolaga ja oadjebasvuođa mánáide dien gaska otnáža ektui. Go ii han odne leat diekko vázzingeaidnu, lohká son.

-Almmuhus-