-Almmuhus-
MAGASIIDNAFállá bohccobierggu indialaš borramuššan

Fállá bohccobierggu indialaš borramuššan

-

-

Jus leat váibmil bohccobirgui ja indialaš borramuša, de sáhtát dan máistit boahtte háve go leat oaivegávpogis fitnamin.

Sápmelaččat gal geavahit bohccobierggu feara makkár borramušaide, muhto dážaide ii soaitte dat nu dábálaš. Mr. India borranbáiki Oslos seaguha bohccobierggu ja eará Norgga borramušávdnasiid dego luosa ja vuovderuigobierggu indialaš máistagiiguin.

 – Dát ii leat gal veaháš ge dábálaš muhto mii háliideimmet bidjat «guhkesmátkke-» ja «oanehismátkkebiepmuid» vuostálaga go ođđasit rabaimet borranbáikki ja ráhkadit veaháš earálágan biebmokártta. Nu válljiimet earret eará bohccobierggu geavahit, muitala restaurantahoavda Sanjiv Sharma.

 

– Bohccobiergu buoret go ealggabiergu

Sharma muitala iežaset geahččalan sihke ealggabierggu ja eará fuođđobiergguid sehkket indiálaš máistagiiguin.

 – Muhto ealggabierggus ovdamearkka dihte, lei menddo gárra smáhkka. Bohccobierggus lei vuohkkasat smáhkka, čilge son.

 

Bisuhit smáhka

Borranbáikkis leat dál guokte borramuša masa leat seaguhan bohccobierggu. Nubbi lea dakkár curry-borramuš mas biergu lea basson sierra, ja máistagat ja ruotnasat fas sierra.

 – Mii eat hálit ahte máistagat galget báidnit biergosmáhka nu ahte das ii leat šat bohccobiergosmáhkka, danne leat nie dahkan. Ja dan maid dávjá borret bohccobierggu searvvis, jokŋameasttu, leat lonuhan mangochutneyn man borret ges indias, muitala Sharma.

 

Bures vuostáiváldon

Dán borramuša dáfus lohká borranbáikkehoavda iežaset leamaš veahá eahpádusas.

 – Muhto olusat diŋgojit dan. Maiddái guossit orrot álggos eahpádusas muhto de orro varra nu miellagiddevaš ja earálágan ahte liikká diŋgojit dan, ja maŋŋil go leat máistán de lohket liikot dasa.

Sharma muitala maiddái olu olgoriikkalaš turisttaid galledit sin.

 – Sidjiide lea bohccobiergu amas ja miellagiddevaš, man eai leat máistán ovdal ja nu besset ge dan dahkat dáppe.

 

Ostet Plassjes

Bohccobierggu muitala Sharma oastit Oslos lágideddjiid bokte.

 – Mii vuoruhat oastit bierggu mii boahtá Plassje guovllus go das láve dássedis kvalitehta. Jus dattege dat ii leat fidnemis de diŋgot bierggu mii boahtá davvi duoddariin, čilge Sharma. Son ii loga Mr. India borranbáikái leat vuos gánnáhahttin diŋgot bierggu njuolga biergobuvttadeddjiin.

 – Mii eat geavat vuos nu olu bohccobierggu, ja jus galgat njuolga diŋgot de fertet veaháš eanebuš oastit. Muhto mii áigut joatkit geavaheames bohccobierggu go das lea buorre johtu.

 

Márkanlávdegoddi duđavaš

Bohccobierggu márkanlávdegotti jođiheaddji John Anders Lifjell lea ilus go bohccobiergu geavahuvvo ođđa vugiin.

 – Dát lea máilmme gelddolaš. Dál leat norgalaččat leamaš máilmmis johtimin ja de buktet ođđa borramušvieruid ruovttoluotta maidda sáhttit seaguhit iežamet borramušávdnasiid. Dát čájeha ahte bohccobiergguin sáhttá ráhkadit maiddái indialaš biepmus, dadjá Lifjell.

 


DUHTAVAŠ: Bohccobiergo márkanlávdegotti jođiheaddji John Anders Lifjell.
Vuorkágovva: Inga Marie Guttorm

 

Olu vejolašvuođat

Lifjell muitala márkanlávdegotti háliidan čalmmustahttit ahte bohccobierggu sáhttá vaikke makkár borramušaide geavahit.

 – Dál oaidnit ahte maiddái nuorat leat borragoahtán bohccobierggu ja ahte lea ávki čalmmustahttit vejolašvuođaid. Ja mii dárbbašat eambbo biergoostiid go de loktana biergohaddi ja nu dine ealáhus maid dáinna, dadjá Lifjell ja lohká bohccobierggus sáhttit ráhkadit vaikke makkár borramušaid.

 

 – Olusat han lohket bohccobierggu leat divrrasin, maid sidjiide logašit?

   – Biergojearru mearrida hatti. Ja go lea eanet jearru go gálvu de loktana haddi dan mielde. Ja leat olusat geat mielas mákset bohccobierggu ovddas. Dál leat biergovuorkkát gurrosat eai ge dieva ovdal čakčat fas.

 

 

 

-Almmuhus-