-Almmuhus-
OĐĐASATFáhkka ožžo ođđa vovnna

Fáhkka ožžo ođđa vovnna

-

-

Guovdageainnu girkolaš ovttasráđđi oaččui duorastaga skeaŋkka, namalassii áibbas ođđa girkogárdevovnna. Kristian Solheim lohká ahte son ii lean gillen muitalit maide, go ii de livčče leamaš skeaŋka.

Guovdageainnu girkolaš ovttasráđđi oaččui duorastaga ođđa girkogárdevovnna.

19 fitnodaga ja eaŋkilolbmo leat ovttas oastán vovnna girkui, ja ikte skeŋkejedje dan.

 

Álki oažžut searvat

Kristian Solheim ja Terje Holmen leaba áŋgiruššan oažžut dán vovnna Guovdageainnu girkui. Solheim muitala ahte soai áigguiga álggus ieža ráhkadit vovnna, muhto dan jurdaga soai šluhttiiga, ja álggiiga ohcat vovnna háttiid.

30 000 mávssii dat vovdna mii orui heiveme, ja soai álggiiga ohcat eambbosiid geat servet skeŋkii.

– Olbmot ledje nu positiivvat, ja lei álki oažžut searvat, lohká Solheim.

 

– Ráhkadan sabehiid

Solheim lei ohcan dieđuid ovdagihtii, ja gávnnahan ahte measta buot Norgga girkuin leat dákkár vovnnat, muhto Guovdageainnus ii lean. Vovdna sáhttá adnot geasset ja dálvet.

– Jus dálvet ii goastta, de áiggun ráhkadit sabehiid dasa, lohká Solheim.

(Ášši joaktá gova vuolábealde)


Álggaheaddji Kristian Solheim. Govven: Sárá Máret Rávdná Oskal

 

Hirpmástuhtii

Kristian Solheim ii lean muitalan girkolaš ovttasráđđái maide, ovdal go lei juo buktime skeaŋkka. Solheim lohká ahte lea hoahkan dan máŋgii, ja ahte girkolaš ovttasráđis dihte su plána birra, muhto eai diehtán ahte vovdna lei juo boahtime.

– Ii dalle livčče skeaŋka leamaš, jus mun livččen ovdagihtii muitalan goas dat boahtá, lohká son.

 

Hávdadeamis jurdilii

Jurdda bođii go lei hávdádeamis Ráissas, gos lei dákkár vovdna. Vovnnain galgá fievrridit gisttu girkus hávddi lusa. Su mielas orui nu geahpas. Dasto lei moadde vahkku maŋŋil Guovdageainnus hávdádeamis, ja doppe ii lean vovdna. De son jurddašii ahte dakkár vovdna livččii buorre.

 

Olusat searvan

Skeaŋkka leat 19 fitnodaga ja eaŋkilolbmo ovttas oastán, ja Solheim lea hui giitevaš buohkaid ovddas geat serve skeŋkii. Son lohká iežas olu jurddašan jápmima birra, ja lea lohkan iežas mánáide ahte eai galgga badjelmeare rahčat.

– Dál dieđán goit go mun jámán, ahte eai dárbbaš rahčat, mu guoddit, loahpaha Solheim.

 

Somá ja buorre

Jan Ole Buljo, Guovdageainnu girkolaš ovttasráđis, lohká diehtán ahte Solheim lea áŋgiruššame oažžut dákkár vovnna Guovdageainnu girkui.

– Mii girku bealis leat hirbmat giitevaččat go leat ožžon vovnna. Lea somá ja buorre go gávdno dákkár áŋgiruššan. Mii giitit Kristiana go lea álggahan dán, son lea guhká juo hoahkan dákkár vovnna, lohká Buljo.

(Ášši joatká gova vuolábealde)


Jan Ole Buljo. Vuorkágovva: Karen Anne Buljo

Son muitala ahte dát vovdna boahtá hui bures atnui, erenoamážit dál, go girkogárdi galgá stuoriduvvot, ja gaska guhkku girkus hávddiide.

– Ovdal lea dálveáigge adnon reahka, dán vovdnii lea atnu. Ipmirdan bures ahte lea lossat guoddit gisttu, lohká Buljo.

-Almmuhus-