-Almmuhus-
-Almmuhus-
OAIVILAT Fáhkka fallehit Sis-Finnmárkku Diggegotti

Fáhkka fallehit Sis-Finnmárkku Diggegotti

-

-

KRONIHKKA:

Duopmustuolu-ođasteamis, man ráđđehus bijai ovdii Stuorradiggái golggotmánus, ledje olu heajos árvalusat heaittihit ja guovdduštit diggegottiid, muhto juovlamánu 1 .b. fáhkka njuolgut fallehuvvui Sis-Finnmárku diggegoddi (SFDG). Ovddádusbellodat lei fidnen ráđđehusa beallái rievdadit Finnmárkku diggegottiid. SFDG galgá dál heaittihuvvot iešheanalaš diggegoddin, ja Porsáŋgu sirdojuvvo Álttá ja Hámmárfeastta diggebirii

Nu mearriduvvui Stuorradikkis 1.12.2020, muhto min mielas dat lea áibbas dohkketmeahttun. Dat čoavddus ii lean guorahallojuvvon, iige sáddejuvvon gulaskuddamii. Nu eai ge beassan gustovaš aktevrrat, nu mo Sámediggi, gielddat, diggegoddi ieš dahje earát, buktit cealkámušaid áššis.

Mii leat gulaskuddan professor Øivind Ravnain UiT:s, gii oaivvilda ahte go ášši ii leat konsulterejuvvon Sámedikkiin, de dat rihkku ILO-soahpamuša ja ON`a álgoálbmotjulggaštusa konsultašuvdnageatnegasvuođa. Son oaivvilda maid ahte dat čielgasit rihkku ráđđehusa konsultašuvdnašiehtadusa Sámedikkiin, man Erna Solberg čálii vuollái gielddaministtarin miessemánu 11. b. 2005

Gáibádusat duopmostuoluide ja daid organiseren, ja gáibádusat duopmáriid gelbbolašvuhtii, máhttui ja gáttuide dagahii ahte Sis-Finnmárkku diggegoddi ásahuvvui jagi 2004. Ráđđehus ja Ovddádusbellodat hilgo dál dáid geatnegasvuođaid, ja heaittiheapmi dahje ođđa organiseren mii goarida riektevuogádaga sámi dimenšuvnna, sáhttá álkit rihkkut Vuođđolága §108, lohká Ravna

Mii beroštit ja atnit fuola das ahte riektevuogádaga sámi dimenšuvdna váldo duođas, ja dan dahkat buoremusat go váldit vára Sis-Finnmárkku diggegottis, mii lea áidna riekteinstánsa mas lea sámi riekteipmárdus, ja máhttu ja árvvus atná sámi riektegálduid ja riektedábiid. Nu de maid addá diggegoddái vuođu ovddidit ja sihkkarastit sámegiela riektegiellan.

Dálá Sis-Finnmárkku diggegottis lea buot duopmáriin dát gelbbolašvuohta, ja sámi oasálastit besset gulahallat sámegilli njuolgut duopmáriidda. Diggegottis lea maid stuorra mearkkašupmi háhkat ođđa sámi advokáhtaid ja duopmárfamohasaid.

Ii leat goassige maŋŋit jorggihit, lohket viisát. Mis lea garra vuordámuš ahte ráđđehus ja OB guorahallet ášši lagabui, ja stáhta geatnegasvuođaid várjalit ja nannet sámi dimenšuvnna riektevuogádagas. Jos áddejit daid váikkuhusaid, de fertejit jorggihit ja bisuhit Sis-Finnmárkku diggegotti. Dakkáraš hoahpus falleheapmi, man diggegoddi gieskat vásihii, ii leat árvvolaš riektestáhtii.

Jenny Klinge, justispolitihkalaš gulahallanolmmoš, Guovddášbellodat

Geir Iversen, stuorradiggeáirras, Guovddášbellodat

Elisabeth Erke, Guovddášbellodaga sámediggejoavku

Nancy Porsanger Anti,  Finnmárku Guovddášbellodaga 2. áirras

-Almmuhus-