Son lea guhkes áiggi čoaggán fáhcaid. Dál lea gearggus čájehit badjel 100 pára gođđonfáhcaid.
Golggotmánu 31. beaivvi rahppo márkanfáhcca čájáhus Árranis, čállá arran.no. Čájáhusas čájehit Johkamohke ja Čohkkirasa hearvafáhcaid. Lea ednologa Erika Nordvall Falck, Vazážis eret Davvi Ruoŧas, gii lea čoaggán daid fáhcaid guhkes áiggi. Rahpandoaluin muitala son dáid fáhcaid birra eambbo.
Erika Nordvall Falck lohká dát dološ čábbát hervejuvvon ivdnás fáhcat boktet sus moji.
– Justa dan maid mii dárbbašit skábman. Čájáhusas čájeha son 100 gođđon fáhccapára.
Eahkedis lágiduvvo gođđineahket ja dalle sáhttet olbmot oastit minstariid ja láigepáhkaid.
Erika Nordvall Falck čállá ieš
« Mii livčče eallin fáhcaid haga? Ja joatká «Fáhcat suddjejit. Fáhcat lea čáppisvuohta. Fáhcat gođđojuvvojit iluin ja áimmahuššamiin. Fáhcat geasuhedje mu árrat, dat liggejit mu. Ieš gođán dološ láhkai ja návddašan duoji.»
Erika Nordvall Falck muitala son lea čoaggán fáhcaid iežas guovllus ja dađe mielde go čokkii, de áddegođii eambbo.
– Čájáhusas čájehan osiid mu čoakkáldagas, muhto váldovuoruheapmi dán háve lea Johkamohkki dahje julevsámi guovlu ja Čohkkiras maid dán áiggi gohčodit Giron-guovlun, muitala Erika Nordvall Falck.
Lassin dáid fáhcaide, de lea son maid gođđán áhččis oarpmeale fáhcaminstariid mielde maid son ges lei čoaggán.
