-Almmuhus-
OĐĐASATFacebook čállosiin sáhtát vuoitit iPada

Facebook čállosiin sáhtát vuoitit iPada

-

-

Leat go viššal sosiála mediaid bokte muitalit jurdagiiddát, oaiviliiddát ja bargguidat birra? Dál sáhtát diekkár čállosiiguin vuoitit iPada.

Njuolggadusat čállingilvui:

– Čállingiella lea davvisámegiella.

– Čállosiid hápmi: Čále iežat árgabeaivvi jurdagiid ja/dahje áiccuid dás ja dál. Ovdamearkka dihte čále nu go lávet čállit sosiála mediai, dan maid háliidat muitalit dál.
– Fuomáš ahte eat dohkket oanádusaid!
– Ii leat šáŋŋergáibádus, čále mo háliidat.
– Čállingilvu lea buohkaide, mis leat 3 luohká: Vuollel 14-jahkásaš mánát, 15-20-jahkásaš nuorat ja badjel 21-jahkásaš rávisolbmot 2.
– Čállosis galget leat gaskal 5 ja 20 cealkaga.
– Jus máŋggas servet ovttain čállosiin, de lea unnimus mearri ahte čállosis leat vihtta cealkaga guhtege olbmo nammii.
–  Čálus galgá sáddejuvvot e-poastačujuhussii lohkanguovddas@samiskhs.no maŋemusat juovlamánu 11. beaivvi.

 

Čállosiid almmuheapmi:

– Čállosiid oamasteaddjit leat čállit, gilvvu lágideaddjit ožžot almmuhit čállosiid gilvvu oktavuođas jus čálli addá lobi (Ávvira neahttasiiddus ja báberaviissas, Sámi lohkanguovddáža neahttasiiddus ja dáid seamma ásahusaid Facebook-siidduin).

– Mii divvut čállinmeattáhusaid čállosiin ovdal go almmuhit daid.

– Čálli sáhttá maiddái dáhttut ahte čálus almmuhuvvo čálli nama haga.

 

Vuorbádeapmi

– Mii válljet golbma buoremus čállosa guhtege ahkeluohkás.
– Čállosat válljejuvvojit jury bokte, dan vuođul mo teaksta osiiguin ja ollislaččat nákce lohkkiide addit buriid vásáhusaid. Jurylahtut leat journalista Alice Balto (Ávvir), áŋgiris čálli ja bloggar Siri Gaski, ja Sámi lohkanguovddáža jođiheaddji Lisa Baal.
– 1. vuoitu guhtege luohkás lea neahttabreahtta, 2. ja 3. vuoittut leat girjevuoittut.

Dán čavčča lágida Sámi lohkanguovddáš čállingilvvu ovttas Ávviriin. Lohkanguovddáš lea juo guhká lágidan čállingilvvuid jahkásaččat, muhto leat leamašan ráddjejuvvon gilvvut, nu movt ovdamearkka dihte agi ektui. Dán jagi lea vejolaš buot davvisámegielagiidda searvat.

 

Čalbmerávkalanbottu čállosat

– Mii leat oaidnán ahte leat ovdal nagodan movttiidahttit nuoraid čállit, go mis ledje diibmá 80 čállosa mielde gilvvus. Danne háliideimmet dál geahččalit oažžot olbmuid gilvalit daiguin čállosiiguin maid beaivválaččat čállet sosiála mediain. Dálá olbmot čállet ollu sosiála mediain, ja nagodit buktit ovdan árgabeaivvi fearániid ja jurdagiid oanehis čállosiin, muitala Lohkanguovddáža ossodatjođiheaddji Lisa Baal.

 

Sáhttá rekruteret

Baal muitala sii leat searvan Ávviriin dainna go oidne lulde lei okta stuora aviisa lágidan dákkáraš gilvvu.

– Mii jurddašeimmet de heive searvat sámi aviissain, go Ávvir maid dárbbaša muhtomin čállosiid, ja dat gilvu han movttiidahttá ja rekruttere ođđa olbmuid journalistaohppui. Dat maid hástala olbmuid duostat leahkit eanet kreatiivan ja sáhttá maid rekrutteret ođđa girječálliid, lohká Baal.

 

Ieža mearridit

Dál leat gilvvus golbma luohká, 14-jahkasaš mánát, gaskal 15- ja 20-jahkásaš nuorat ja badjelaš 21-jahkásaččat, nu ahte dál lea buot davvisámegielagiiguin vejolaš searvat gilvui.

– Čállosiin galget gaskal 5 ja 20 cealkaga, ja moattis sáhttet maiddái ovttas čállit ja searvat gilvui. Gilvui sáhttá searvat juovlamánu 11. beaivvi rádjái, ja lea jury mii vállje dan golmmá luohká vuitiid. Vuoitun leat iPad ja girjevuoittut. Vuoitit maid besset ieža mearridit háliidit go čállosiid almmuhuvvot Ávviris, lohká Baal.

 

Hástala čállit sámegillii

Ávvira váldodoaimmaheaddji Kari Lisbeth Hermansen oaidná dehálažžan searvat dákkár gilvui.

– Ávvir searvá dan gilvui go mii áinnas doarjut gilvvu mii hástala buohkaid čállit eambbo sámegillii, sihke neahtas ja eará oktavuođain. Sámegiella lea hearkkes dilis ja lea hui mávssolaš go Lohkanguovddáš lágida gilvvu mii hástalit olbmuid čállit eambbo sámegillii, lohká son.

 

Heive buohkaide

Hermansen lohká dát lea vel dakkár gilvu masa ii dárbbaš nu olu čállit ovdal go sáhttá searvá, dušše gaskal 5-20 cealkaga.

– Dat leage de gilvu mii heive buohkaide, go gilvui sáhttá njulgestaga searvat sullásaš čállosiin go láve ovdamearkka dihte Facebookii čálistit. Mii oaidnit maid dieđusge dán hui buorren vejolašvuohtan láidestit ođđa lohkkiid avvir.no siidui, go čállosat almmuhuvvojit dan siiddus dađi mielde go bohtet. Mii ávžžuhit buohkaid, sihke nuorabuid ja boarráseappuid, searvat gilvui, lohká son loahpas.

 

-Almmuhus-