Odne diibmu guovttis Norgga áiggis čiekčá FA Sápmi Panjab vuostá. Panjab joavku lea einnostuvvon favorihttan FA Sámi puljas, ja FA Sámi hárjeheaddji Morten Pedersen muitala Ávvirii dán čiekčama šaddat garasin.
Odne diibmu guovttis Norgga áiggis čiekčá FA Sápmi Panjab vuostá. Panjab joavku lea einnostuvvon favorihttan FA Sámi puljas, ja FA Sámi hárjeheaddji Morten Pedersen muitala Ávvirii dán čiekčama šaddat garasin.
Garra gilvvut lávejit maid dárbbašit rutiinna ja stabilitehta joavkkus, muhto Pedersen lea bidjan otná čiekčamii sierra taktihka. Son muitala ahte lea oaidnán Panjab hárjehallamin, ja orru leat nana, garra joavku.
Garas vai ii, de son muitala ahte otná jurdda lea lonuhaddat čikčiid álggu rájes jo, njulgestaga addit čiekčanáiggi buohkaide.
Diibmu 14.00 (Norgga áiggis) álggii čiekčan, muhto sáttá lea maŋiduvvon diibmu 17.00 rádjai. Sáddaga beasat oaidnit dáppe. Dán ovddas šattat máksit.
Vuittii
FA Sápmi vuittii iežas vuosttas riikajoavkočiekčama Conifa World Cup čiekčamiin mat lágiduvvojit Abkhasias.
Vuosttas čiekčan lei sotnabeaivvi Somaliland vuostá, mii orru leamaš álkes čiekčan FA Sápmái, go sii vuite olles 5-0.
– Lei buorre álgu Somaliland vuostá mis.Viđain moalain vuittiimet, ja vihtta iešguđet čiekči bidje moala, muitala Sámi riikajoavkku hárjeheaddji Morten Pedersen Ávvirii.
Várrugas
FA Sápmi soaitá jo kvalifiseren iežas viidásat World Cup čiekčamiin maŋŋá go vuittii Somaliland vuostá, muhto Pedersen ii ávvut dan dattetge. Son ii loga maidege sihkarin ovdal go pulja lea vuiton.
– Mii doallat fokusa ja čiekčat ovtta čiekčama dađis, das mii oaidnit man guhkás ollet, muhto orru gal jo ahte mii leat beassan njealjádasfinálii, muhto ii leat 100 proseantta sihkar ovdal go pulja lea vuiton.
Stuorra jáhkku ollet guhkás
FA Sámi presideanttas Håkan Kuorakas lea stuorra jáhkku jovkui šattaš go garra čiekčan vai ii. Son oaivvilda dán jagi sis lea vejolaš ollet guhkás. Son muitala Ávvirii ahte vuoitimis pulja, de ferte dát čiekčan maid vuitot.
– Mis lea nana joavku dál, ja jus čiekčat seamma bures go Somaliland vuostá, de mii gal ollet guhkás.
Vejolaš
Panjab lea rangerejuvvon 12 buoremusa searvái Conifa rangerenlisttus. FA Sápmi lea 20. sajis. Jus geahččá jagi 2014 Conifa World Cup bohtosiid mielde, de birgii FA Sápmi iežas 3. divišuvnna čikčiiguin bures Abkhasia vuostá, mii lea rangerejuvvon vuosttažin Conifa rangerenlisttus.
Abkhasia vuittii dalle ovttain moalain FA Sámi vuostá, 2-1. Dieđus ollu sáhttá geavvan dán guovtti jagis, muhto dan maid orrot FA Sámi bealis dahkan. Joavku galgá leat nannosat dán jagi iežas alit divišuvnna čikčiiguin.
