Dál lea fas áigi juohkit John Savio -bálkkašumi, evttohanáigemearri guhte dáiddár ánssáša bálkkašumi lea njukčamánnu 31. beaivvi.
– Bálkkašupmi addojuvvo dáiddárii guđes lea sámi duogáš ja identitehta ja guhte lea erenoamáš fuomášumi ožžon visuála dáiddársuorggis Norggas dahje olbmui guhte lea dahkan iežas erenoamáš mearkkašahttin ovddidit dáidaga mii vuolgá sámi kultuvrras Norggas, čállá Bildende Kunstneres Hjelpefond preassadieđáhusas.
Kandidáhtta John Savio -bálkkašupmái
Bildende Kunstneres Hjelpefond čállá ahte juohkehaš sáhttá evttohit kandidáhta Savio-bálkkašupmái. Čearddalašvuohta, ássanbáiki ja searvegullevašvuohta ii mearkkaš maidige, muhto dáiddár guhte váldá vuostái bálkkašumi galgá doaimmastis eanaš leat dahje leamaš Norggas. Buot evttohusain galgá leat ágga.
Gii lei John Savio:
John Andreas Savio (1902-1938) lei okta ovdavázziin (pionèr) sámi dáiddáriidda. Son lei vuosttaš sápmelaš guhte gaccai oahpu Statens Håndverks- og Kunstindustriskuvllas ja vuosttas sápmelaš geas lei sierračájáhus Nasjonalgalleriijas. Ollesolmmožin son elii geafesvuođas, ja duođai gudni su dáiddalaš doaimmain son oaččui maŋŋá su jápmima. John Savio lea erenoamáš dovddus su gráfalaš bargguid geažil, main leat motiivvat sámi kultuvrras ja eallimis, vaikko vel njuođai ja sárggui. John Savio jámi Oslos 1938s, 36 jagi buoris.
Gáldu: Kunstfond
Geigejuvvo juohke nuppi jagi
2023:s lea viđát geardde go John Savio -bálkkašupmi juhkkojuvvo. Bálkkašupmi juhkkojuvvo juohke nuppi jagi, ja lea Bildende Kunstneres hjelpefond (BKH) mii lea ásahan dan, čalmmustahttit dáidaga vuolgán sámi kultuvrras. Bálkkašupmi geigejuvvo ovttas Sámi Dáiddačehpiid Servviin ja Davvi-Norga Dáiddamuseain. Árvvoštallanlávdegottis leat guokte ovddasteaddji Sámi Dáiddačehpiid Searvvis, ja okta ovddasteaddji Davvi-Norga Dáiddamuseas. Lávdegoddi buktá árvalusevttohus BKH stivrii ovdal cuoŋománu loahpas.
Dát leat ožžon bálkkašumi
Sii geat leat ožžon ovdal leat Geir Tore Holm (2015), Britta Marakatt Labba (2017), Aage Gaup (2019), ja Keviselie (Hans Ragnar Mathisen, 2021). Bálkkašumi sturrodat 2023:s lea 200 000 ruvnno.
