-Almmuhus-
-Almmuhus-
-Almmuhus-
KULTUVRAEvttohuvvon «Dán jagáš dáiddár» bálkkašupmái 

Evttohuvvon «Dán jagáš dáiddár» bálkkašupmái 

-

-

– Dáiddalaš jienain lea son ožžon olles máilmmi rabistit čalmmiid ja fuomášit sámi rivttiid Norggas, lohká Subjekt magasiinna váldoredaktevra Danby Choi.  Dál lea son persovnnalaččat evttohan sámi dáiddára oažžut bálkkašumi.

Lea vuosttaš geardde go juhket dán áibbas ođđa bálkkašumi, ja bálkkašupmái lea sámi dáiddár okta listtus gii lea nammaduvvon.

 

Vuoiti oažžu gudni ja rámi

Bálkkašupmi lea vuosttažettiin gudni ja rápmi, ja geigejuvvo formálalaččat juovlamánu 18. beaivvi Oslos.

– Subjekt lea kritihkalaš dáiddamagasiidna nuorra olbmuide mii gávdno neahtas,  ja maŋŋel buot dáidda- ja servvodatkritihkaid,  leat dan maŋemus mánu dán jagi válljen rámidit daid buoremus dáidda- ja kulturdoaimmaid Norggas, čilge váldoredaktevra Danby Choi.

 

Fuomášii dáiddalaš proteastta

Subjekt magasiinna váldoredaktevra fuomášii Máret Ánne Sara ja su dáidaga maid lei Stuoradikki olggobeallai ceggen diimmá juovlamánus.

Danby Choi cuiggodii dalle Trine Skei Grande go lei govven gova Oslo gávpogis ja čállán ahte lea juovladovdu, seammás go Sara dáidda oidnui lagamusas govas.

– Dát lea dáiddalaš proteasta mii guoská sámi rivttiide – proteasta stáda ja earáid vuostá geat čohkkájit Stuoradikki vistti siste. Dalle lea heahpat,  ja veahá ártet, go stuoradiggeáirras ja parlamentáralaš jođiheaddji ii fuomáš dan, cuiggodii Choi ja deattuhii dalle ahte dakkár dáiddaprošeavttain lea vejolašvuohta ságastallat ja jurddašallat.

 

Vuosttaš geardde

Lea vuosttaš geardde go Subjekt geige bálkkašumiid, ja sin mandáhtta lea bálkkašumiin rámidit ja gudnejahttit sin geat eanemusat ánssášit dan.

– Leat ovcci kategoriijas dáidda, musihkka ja servvodatsuorggis nammadan 50 olbmo, doaimma, almmuheami, institušuvnna ja čájáhusa, go mii fertet fuomášit daid buriid kulturdoaimmaid mat leat min riikkas, čilge Choi.

 

Earret go Máret Ánne Sara, de leat dát earát nammaduvvon «dán jagáš dáiddár» bálkkašupmái: Apichaya Wanthiang, Christian Tunge, Herman Mbamba, Maria Pasenau, Marthe Elise Stramrud ja Tor Erik Bøe.

Leat olbmot geat jienastit dan dáiddára gean háliidit vuoitit bálkkašumi.

 

-Almmuhus-