Ráđđehus evttoha Stuorradiggái lasihit Nordland fylka nama julevsámi Nordlándda namain.
Gieldda- ja ođasmahttindepartemeanta evttohii Stuorradiggái árat dán giđa rievdadit láhkaparagráfa 29 mii guoská mo nammadit ja rievdadit gieldda- ja fylkkagielddaid rájáid, vai almmolaš namma Nordland fylke šattašii Nordland ja Nordlándda. Dalle oččošii fylka guokte fylkkanama, sihke dárogillii ja julevsámegillii.
Ákkastallamis lohká ráđđehus ahte sámegiella ja kultuvra lea dehálaš olu guovlluin Nordlánddas. Ráđđehus lea danin deattuhan ahte Nordlándda lea áidna fylka gos lea áigeguovdil nammadit dan julevsámegiel namain. Ráđđehussii leamaš maid dehálaš ahte Nordlándda fylkkagielddas geavahuvvo sihke davvisámegiel ja máttasámegiel namma fylkkagieldda diehtojuohkimis, vai daid gielaid maid áimmahušašii.
– Lea hui somá gullat ahte fylkanamma Nordlándda maid váldo atnui. Mu mielas dat nanne ja duođašta ahte báikenamat mat leat juo anus váldojuvvojit atnui almmolaččat. Dat lea lunddolaš lávki čalmmustahttit sámegiela, kultuvrra ja servodateallima. Šaddá hui ilolaš beaivi go namma mearriduvvo. Lean maid hui ilus go namma-ášši lea mannan njuovžilit, iige lea bohciidahttán digaštallama ja vuostehágu, lohká Sámedigge ráđđelahttu Mikkel Eskil Mikkelsen.
