Ovddádusbellodat ja Rukses bellodat leat Ealáhuslávdegottis evttohan Stuoradiggái ahte hálbbidit bensiinna boazoealáhussii.
Disdaga, geassemánu 7. beaivvi, galgá Stuoradikki dievasčoahkkin meannudit ášši mas Ovddádusbellodat ja Ruksesbellodat leat evttohan ahte Stuoradiggi čuovvola Norgga Boazosápmelaččaid Riikasearvvi (NBR) gulaskuddancealkámuša 2022/23 boazodoallošiehtadusa olis.
NBR leat evttohan ahte luoddadivtoasi váldit eret boazodoalu mohtorfievrruid dáfus.
Bellodagat čujuhit gulaskuddancealkámuššii maid NBR lea buktán, mas evttohit luoddadivada váldit eret. Bellodagaid ovddasteaddjit čujuhit ahte fievrrut mat boazodoalus adnojit, seamma go eanandoalu fievrrut, hui unnán geavahuvvojit luottaid alde. Danin berre čielggaduvvot man muddui fievrrut mat adnojit boazodoalus, seamma go fievrrut mat adnojit eanandoalus, galggašedje oažžut vejolašvuođa divatkeahtes bensiinna atnit.
Ovddádusbellodat ja Rukses bellodat evttohit ná Ealáhuslávdegotti gieđahallamis:
«Stuoradiggi bivdá ráđđehusa bidjat johtui doaimmaid vai fievrruide, maid boazodoalus atnet, galget sáhttet atnit bensiinna dahje diesela mas ii leat luoddadivat.»
Luoddadivat
Norgga stáda bensin- ja dieseldivadat leat golmma oasis. Vuosttaš lea vuos luoddadivat, dasto Co2-divat, ja dasa lassin vel lasseárvodivat.
Luoddadivat ja Co2-divat leat fásta divadat, mat eai rievddat bensinhatti mielde. Lasseárvodivat rievddada hatti mielde.
Smartepenger.no lea čielgasit juohkán daid divadiid vai galgá álki ipmirdit, ja lea rehkenaston olu littara ala lea divat.
Bensiinnas: Luoddadivat 4,95 ruvnno, Co2-divat 1,78, ja lasseárvodivat dasa lassin vel.
Dieselis: Luoddadivat 3,52 ruvnno, co2-divát 2,05 ruvnno, ja lasseárvodivat vel dasa lassin.
Jus boazodoalu bealis oččošedje luoddadivatkeahtes bensiinna dahje diesela, de livččii bensiidna 4,95 ruvnno hálbbit go dál, ja diesel fas 3,52 ruvnno hálbbit.
