Djupedal-lávdegoddi evttoha lága bokte geatnegáhttit konkrehta maid skuvllaid galget dahkat go oahppit givssiduvvojit dahje hárddáhallet skuvllas. Jus dan eai daga, de galget sáhkkohallet.
Mannan vahkku geigii Djupedal-lávdegoddi maid Aust-Agdera Fylkkamánni, Øystein Djupedal, lea jođihan, lávdegotti guorahallama hárdima ja givssideami birra máhttoministarii, Torbjørn Røe Isaksenii.
Lávdegoddi evttoha lága bokte konkrehta mearridit maid skuvllat leat geatnegahttojuvvon bargat jus fuomášuvvo ahte oahppi givssiduvvo skuvllas. Lávdegoddi evttoha maid ahte dat skuvllat ja suohkanat maid eat čuovvol givssidanáššiid galget ráŋggáštuvvot ekonomalaččat.
– Mun vuorddán ja sávan ahte dat bovttašii dehálaš ja dárbbašlaš digaštallamiid, lohká Máhttoministtar Torbjørn Røe Isaksen preassadieđáhusas.
17 000 máná givssiduvvojit
– Birrasii 17 000 máná givssiduvvojit. Dat lea bávččas ja váttis ovttaskas mánnái gii dan šaddá vásihit, muhto lea seammás maid duođalaš servodat- ja álbmotdearvvašvuođaváttisvuohta. Danne fertet mii gávdnat ođđa vugiid mo eastadit givssidemiid, lohká máhttoministtar.
Lávdegoddi cealká guorahallamis ahte sii sávvet ahte buohkat geat barget skuvllain galget oahppat eambbo mo eastadit givssidemiid ja mo bargat givssidanáššiiguin, ja oidnet dárbbu miehtá riika bijat johtui gelbbolašvuođaloktendoaimmaid.
Vejolaš váidit Mánáidáittardeaddjái
Lávdegoddi evttoha maid Mánáidáittardeaddji rolla viiddidit givssidanáššiid oktavuođas, dan ládje ahte váhnemiin galgá leat vejolašvuohta váidit njuolga Mánáidáittardeaddjái jus skuvla dahje skuvlaeaiggát ii daga doarvái buori barggu bissehit givssideami. Dál lea Fylkkamánni váiddaorgána dákkár áššiin.
Guorahallan lea sáddejuvvon gulaskuddamii ja gulaskuddanáigemearri lea geassemánus. Departemeantta boahtá maid lágidit gulaskuddančoahkkimiid olu báikkiin Norggas sihkkarastit ahte ožžot olu oainnuid ja oaiviliid.
