Raporta «Forslag til etiske retningslinjer for samisk helseforskning og forskning på humanbiologisk materiale» almmuhuvvo odne, vuossárga juovlamánu 4. beaivvi, Sámedikkis.
– Njuolggadusat galget sihkkarastit ahte dutkan váldá vuhtii ja gudnejahttá sámi kultuvrra ja sámi servodagaid dutkanproseassas, dadjá sámediggepresideanta Aili Keskito Sámedikki preassadieđáhusas.
Lávdegotti, man Sámediggi lea nammadan, jođihii professora Siv Kvernmo, Uit. Lávdegottis leat leamaš sámi dearvvašvuođafágalaš dutkanbirrasat ja juridihkalaš áššedovdit.
Bargojoavkku mandáhtta lea ráhkadit evttohusa njuolggadusaide sámi dearvvašvuođadutkama várás.
Evttohus galgá válddahit sámi dearvvašvuođadutkama oppalaččat ja dutkanprošeavttaid main leat mielde biologalaš ávdnasat, dieđiha Sámediggi preassadieđáhusas.
Árvvoštallat
Lávdegoddi galgá árvvoštallat lea go vejolaš ráhkadit geahčastaga das makkár sámi humána biologalaš ávdnasat leat juo ráddjojuvvon.
Dasto identifiserejuvvojit ja problematiserejuvvot sierra hástalusat dáid ávdnasiid rádjama ja ráđđenvuoigatvuođa birra.
Geahčastagas fertejit leat guorahallamat das makkár etihkalaš áššečuolmmat fertejit leat mielde njuolggadusain.
Joavku ferte maiddái guorahallat makkár juridihkalaš stáhtus dánlágan njuolggadusain berre leat.
Ferte maiddái namuhuvvot viidáset meannudeapmi ráđđehusas, eará sámedikkiin ja riikkaidgaskasaš álgoálbmotforumis.
Sámedikki presideanta
Sámediggepresideanta Aili Keskitalo dadjá ahte ulbmil etihkalaš njuolggadusain sámi dearvvašvuođadutkama ja olmmošlaš biologalaš ávdnasiid várás, lea bagadit ovttaskas dutkiid, dutkanásahusaid, sámi servodagaid ja ovttaskas olbmuid makkár dutkanetihkalaš prinsihpat berrejit leat vuođđun sámi dearvvašvuođadutkama várás.
– Deaŧalaš lea ahte sámi dárbbut ja vuoigatvuođat gozihuvvojit dearvvašvuođadutkamis, sihke go guoská min olmmošlaš ávdnasiid eaiggátvuhtii ja movt dát dutkan čađahuvvo, dadjá Keskitalo.
