-Almmuhus-
-Almmuhus-
OĐĐASAT Evttoheaddji duhtavaš

Evttoheaddji duhtavaš

-

-

– Dát bidjá dási das mo kommišuvdna galgá dás rájes bargat, celkkii Knag Fylkesnes presideantagotti árvalusa birra. 

Odne meannuda Stuoradiggi Stuoradikki presideantagotti árvalusa duohtavuođakommišuvnna ásaheapmái. 

Stuoradiggi mearridii mannan geassemánu álggahit kommišuvnna mii galgá guorahallat Norgga stáda dáruiduhttinpolitihka sápmelaččaid, kvenaid ja norgga-suopmelaččaid vuostá. 

Sosialisttalaš Gurutbellodaga áirasat Kirsti Bergstø ja Torgeir Knag Fylkesnes dat ovddiideigga dan Stuoradiggái mannan geassemánu. 

 

Duhtavaš presideantagotti árvalusain

Knag Fylkesnes celkkii ge duorastaga digaštallamis stuoradiggesálas ahte lea duhtavaš proseassain mii dássážii lea dahkkon, mandáhta ja oktiibidjama mearrideamis. Son celkkii maid ahte lea duhtavaš mo presideantagoddi lea fátmmastan sámi, kvena ja norgga-suoma servodagaid ovdabarggus. 

– Dát bidja dási das mo kommišuvdna galgá dás rájes bargat, celkkii Knag Fylkesnes.

Son lea maid duhtavaš go ii leat áigemearri das man maŋos galget geahččat, ja ahte sáhttet geahččat gitta otná beaivái. 

 

Čiekŋalis hávvi

Knag Fylkesnes celkkii maid ahte dás lea sáhka čiekŋalis gažaldagain Norgga stáda bealis, ja ahte lea juogalágan historjjálaš rehket, mo dán čoavdit ja cuiget viidásit luotta.

– Dás mieđihit maid ahte lea leamaš váttes fáddá, ja ahte dáruiduhttin ii leat juoga mii lea leamaš ja lea nohkan, muhto ahte lea juoga man mii fertet čorget. Lea leamaš tendeansa čiehkat sáme- ja kveanaservodagaid gažaldagaid, muhto dál mii čielgasit čorgegoahtit dan, logai son Stuoradikki sárdnestuolus.

Knag Fylkesnes cuiggodii go ii okta ge lullisápmelaš lean kommišuvnnas lahttun, ja ávžžuhii kommišuvnna viežžat vehkiid dan guovllus. 

Loahpas vel ávžžuhii kommišuvnna jurddašit davviriikkalaš dimenšuvnna, das go Suomas ja Ruoŧas maid galggašii álggahuvvot seammasullasaš guorahallan. 

- Advertisement -
-Almmuhus-