– Dievasčoahkkinjođihangotti mielas lea demokráhtalaččat deaŧalaš ahte sámediggeáirasiid čoahkkádus speadjalastá sámi álbmoga govdodaga, dadjá dievasčoahkkinjođiheaddji Tom Sottinen (Bb).
2025 sámediggeválgga čađaheami oktavuođas lea dievasčoahkkinjođihangoddi evttohan sohkabealejuogu gáibádussan listaevttoheddjiide. Sámediggeválggaid láhkaásahusat rahpet Sámediggái vejolašvuođa mearridit sohkabeliide guoski gáibádusa sámediggeválggaid listaevttohusa dohkkeheamis. Láhkaásahusas boahtá ovdan ahte Sámediggi sáhttá mearridit ahte goappáge sohkabealis galgá leat unnimusat 40 proseantta ovddastus evttohuvvon evttohasaid gaskkas juohke listtas.
Dan čállá Sámediggi preassadieđáhusas.
Maiddái ahki ja geografiija dehálaš
Dievasčoahkkinjođihangotti mielas lea deaŧalaš ahte sohkabeliid ovddasteapmi Sámedikkis lea nu dásseárvosaš go vejolaš. Danne leat sii ovddidan ášši mii guoská gáibádusaide sohkabealejuogu birra listaevttoheddjiide. Sámedikki dievasčoahkkin meannuda ášši bearjadaga čakčamánu 27. beaivvi.
Dievasčoahkkinjođihangotti mearrádusárvalus dievasčoahkkimii lea ahte listaevttohus 2025 sámediggeválgii galgá ollašuhttit dan gáibádusa ahte goappáge sohkabealis galgá leat uhcimusat 40 proseantta ovddasteapmi, ovdal go dat dohkkehuvvo.
Sámediggi ávžžuha listaevttohusaid 2025 válgga oktavuođas ávvira atnit ahkečoahkkádusas, duohta sohkabealejuogus, geográfalaš gullevašvuođas ja vuhtii váldit buot sámi joavkkuid, earenoamážit sin geat leat uhcitlogus sámi servodagas.
– Dievasčoahkkinjođihangotti mielas lea demokráhtalaččat deaŧalaš ahte sámediggeáirasiid čoahkkádus speadjalastá sámi álbmoga govdodaga, dadjá dievasčoahkkinjođiheaddji Tom Sottinen (Bb) preassadieđus.
Nagodan doallat
Sámediggi lea maŋemus válggain nagodan doallat sohkabealdássedeattu. Maŋŋel sámediggeválggaid 2021:s leat 41 proseantta válljejuvvon áirasiin nissonolbmot ja maŋŋel 2017 sámediggeválggaid lei nissonoassi 43,6 proseantta.
– Sámediggi lea várra máilmmi dásseárvoleamos álbmotválljen orgána. Dienlágan boađus ii boađe iešalddis ja gáibida dihtomielalašvuođa dásseárvvu birra, ja gáibida maid konkrehta doaibmabijuid, dadjá Sottinen.
Loga áššebáhpiriid áššái 046/24 Gáibádusat listaevttohusaide 2025 sámediggeválgga oktavuođas
