Justiisa- ja gearggusvuođadepartemeanta evttoha viiddidit boarásmuvvanáigemeriid, mii guoská veagalváldimiidda mánáid vuostá. Dat lea okta dain rievdadusevttohusain ráŋggáštuslágas mii sáddejuvvui gulaskuddamii.
Gulaskuddancealkagis evttohuvvo viiddidit boarásmuvvanáigemeriid, mii guoská veagalváldimiidda mánáid vuostá ja vissis eará láhkarihkkumiidda, dannego oanehit boarásmuvvanáigemeriin, ođđa ráŋggáštuslágas, sáhttet leat leamaš unohis váikkuhusat. Dákkár láhkarihkkumiin sáhttet leat dagut maid ii nákce muitalit, gii lea vásihan dan, ovdal go lea gollan muhtin áigi. Dálá boarásmuvvanáigemearit sáhttet dan dihte dahkat váttisin almmustahttit dákkár daguid, ovdal go ráŋggáštusovddasvástádus lea boarásmuvvan.
– Ođđa ráŋggáštusláhka lea boađus stuora barggus, mii lea bistán máŋga jagi, ja láhka rievdadus lea eanas muddui lihkostuvvan. Ráŋggáštusláhka lea okta dain deaŧaleamos lágain riektestáhtas, ja dat váikkuha máŋgga olbmo eallimii, dadjá justiisa-, sisafárren- ja gearggusvuođaministtar Tor Mikkel Wara (OB) preassadieđáhusas.
Ođđa ráŋggáštusláhka
– Departementii lea dát láhka vuoruhuvvon, čađaáigge fuolahit ahte lágas lea alla dássi, vai riektesihkarvuohta ja oadjebasvuohta fuolahuvvo buoremus lági mielde, dadjá vel Wara.
Gulaskuddan lea ođđa ráŋggáštuslága čuovvoleapmi, mii biddjui fápmui golggotmánu 1. beaivvi 2015. Ođđa ráŋggáštuslága fápmudeapmi mielddisbuvttii dárbbu rievdadit ráŋggáštuslága ja eará lágaid. Ii lean goitge vejolaš čuovvulit buot fápmudeami dán oktavuođas. Maŋemus jagiid leat maiddái vásihan máŋggaláhkái lága, ja dan vuođul árvvoštallat rievdadusaid.
Gulaskuddancealkagis evttohit viidáseappot earret eará rievdadusaid man ulbmil lea buoridit vejolašvuođa ráŋggáštit
korrupšuvnna mas leat čanastagat olgoriikii, cealká Justiisa- ja gearggusvuođadepartemeanta preassadieđáhusas.
