Sámedikki dievasčoahkkima ođđa áššiid dieđiheamis evttoha Bargiidbellodaga Arild Pettersen Inga ahte Sámediggi galgá beassat nammadit áirasa álbmotmeahccestivrii.
– Lofotodden álbmotmeahcci lea eanemus profilerejuvvon álbmotmeahcci Norggas. Sámediggi registrere ahte Lofotodden álbmotmeahci stivrras ii leat oktage sámi ovddasteaddji. Berrešii leat prinsihppan ahte sámi guovlluid álbmotmehciin lea sámi ovddastus, ja danne lea lunddolaš ahte stivrras livččii Sámedikki nammadan ovddasteaddji. Sámediggi bivdá sámediggeráđi oččodišgoahtit sámi ovddastusa Lofotodden álbmotmeahccestivrii, evttoha Inga.
