Máhttodepartemeanta evttoha rievdadit njuolggadusaid vai Sámi allaskuvla beasašii ohcat dohkkehuvvot sámegiella ja girjjálašvuođaoahpu doavttergrádaoahppun.
Máhttodepartemeantta evttoha ahte Sámi allaskuvla beasašii spiehkastit njuolggadusain mat celket ahte allaskuvllain fertejit leat unnimusat 15 doavttergrádastudeanta ovdal go besset álggahit doavttergrádaoahpu.
Sápmelaččat nu unnán ahte váttis deavdit gáibádusaid
Sámi álbmoga historjjálaš sierradilli lea duogážin árvalussii, ja dat go Sámi allaskuvllas lea erenoamáš ovddasvástádus ovdánahttit institušuvnna nu ahte fágalaš ovddasvástádus sámi gillii ja kultuvrii áimmahuššo, čállá departemeanta preassadieđáhusastis.
– Ráđđehus áigu heivehit dili nu ahte sámi dutkan ja alit oahppu oažžu buoret eavttuid. Sámi álbmot lea unni, danne lea váttis deavdit gáibádusaid mat gusket stipendiáhttalohkui doavttergrádaoahpuin, dadjá Máhttoministtar Torbjørn Røe Isaksen.
Liikká galget dáhkidit
Vaikke Sámi allaskuvla beasašii ge spiehkastit njuolggadusain, de fertejit liikká dáhkidit ahte allaskuvllas lea govttolaš ja dássedis stipendiáhtalogu ja ahte dáidda fállo buorre fágalaš biras, earret eará geatnegahtti ovttasbarggu bokte eará institušuvnnaiguin.
