Geaidnopolitiijaid ođđaseamos logut čájehit ahte sii bissehit ollugiid geat vudjet gárrenoaivvis, ja sii leat maid vuodjinkoartta massán ovdalaččas. MA evttoha addit sidjiide fas vuodjinkoartta, jus biillas lea lássa mii ii vuolgge jus lea promilla.
Geaidnopolitiijaid ođđaseamos logut čájehit ahte sii bissehit ollugiid geat vudjet gárrenoaivvis, ja sii leat maid vuodjinkoartta massán ovdalaččas. MA evttoha addit sidjiide fas vuodjinkoartta, jus biillas lea lássa mii ii vuolgge jus lea promilla.
Geassemánu ja suoidnemánu bissehedje geaidnopolitiijat máŋgasa geat vudje biillain gárrendilis. 380 gárrenvuoddjis čájehuvvo ahte bealli sis leat ovdalaččas massán vuodjinlobi.
Hehttet šaddamis sorbmin
– Lea vuorjašuhtti go leat nu ollugat geat vudjet gárrendilis ii ge leat vuodjinkoarta. Dieđusge lea buorre go geaidnopolitiijat bissehit muhtimiid sis, muhto ferte bidjat doaimma mii hehtte gárrenvuddjiid beassamis biillain luottaide ja šaddat sorbmin johtolagas, muitala MA johtolatorganisašuvnna generálačálli Elisabeth Fjellvang Kristoffersen preassadieđáhusas.
– Giddagas ii eastat
Massit vuodjinlobi ja maiddái šaddat giddagassii ii oro eastadeame ollu vuddjiid vuoddjámis gárrendilis, ja fas nuppes dahkat dan seamma. Danne háliida MA ahte gárrenvuoddjit, geat leat massán vuodjinlobi, galget oažžut vuodjit jus biillas lea alkolássa.
– Biila ii vuolgge jus vuoddjis lea promilla, ja dat hehtte sin beassamis luottaid ala go leat gárihuvvan, muitala Kristoffersen.
Sihke Ruoŧŧa, Suopma, ja muhtin eará riikkat Eurohpás leat váldán atnui ođđa ortnega. Norggas lea maid leamašan sáhka dán ortnega birra, muhto bargu bisánii 2012:s.
Oidno jus geahččala vuodjit biillain
– Go lea alkolássa, de ii vuolgge biila go vuoddji lea gárremiin. Lea doaibma mii hehtte olbmuid geat máŋgii vudjet gárrenoaivvis. Dát ii galgga leat álkis vuohki doalahit vuodjinlobi. Leat čielga gáibádusat čuovvoleapmái, sihke ovttas doaktáriin ja prográmma bokte. Ferte maid leat ráŋggáštus jus čájehuvvo ahte lea geahččalan vuoddját gárrenoaivvis, muitala Kristoffersen.
– 2012:s bisánii guorahallanbargu, ja dál livččii áigi fas joatkit guorahallama. Politiijaid gárreniskkademiin ja bargguin buoridit miellaguottuid, lea alkolássa buorre doaibma mii eastada gárrenvuodjima. Nubbi doaibma eastadit gárrenvuodjima lea váldit eret biilla sus gii vuodjá gárrenoaivvis, muitala Kristoffersen.
