Sámediggeáirras Karen Anette Anti ovddida Sámedikki dievasčoahkkimis ášši mas cuiggoda ahte geatkenálli lea badjelmeare lassánan.
– Boazodoallu rahčá alla boraspireloguiguin, ja mun balan váikkuhusain go geatkenálli lassána. Doaimmat mat leat dál eai leat ávkin oažžut boraspirelogu dan dássái maid Stuoradiggi lea mearridan, lohká Gáissi válgabiire Norgga Sámiid Riikkabellodaga sámediggeáirras Karen Anette Anti.
– Ii leat kontrolla
Ođđa loguin maid Rovdata lea almmuhan ja mat čájehit boraspirenáli Norggas, oidno ahte 2020:s ledje 63 geatkečivgga olles riikkas. Dat leat 24 čivgga eanet go Stuoradikki mearrádus mii lea 39 čivgga.
– Dán lassáneamis ii leat kontrolla ja ii sáhte joatkit šat. Dálkkádat- ja birasdepartemeantta ferte váldit duođas dan nállelogu maid Stuoradiggi lea mearridan, ja čađahit doaimmaid nu ahte geatkenálli lea dohkálaš dásis, lohká Anti.
Evttoha báhčinbálkká
Anti oaivvilda ahte báhčinlohpi ja doaimmat mat hehttejit riidduid eai leat doarvái go oaidná geatkenáli lassáneame nu dramáhtalaččat badjel našunála mihtuid.
– Vai oažžut geatkenáli vulos dan dássái maid Stuoradiggi lea mearridan, de oaivvildan ahte mii fertet geahččat doaimmaid nu go ásahit báhčinbálkká, evttoha Anti.